Qashqadaryo hokimi Zoir Mirzayev viloyatdagi mahalliy hokimliklar, xalq uchun xizmat qilishi lozim bo‘lgan tashkilotlar panjara bilan o‘ralganini tanqid qildi. Bu haqda “Daryo” viloyat hokimligi axborot xizmati rahbari Ahror Sodiqov ma’lum qildi.
Ta’kidlanishicha, bu haqda viloyat rahbari xalq deputatlari viloyat kengashining navbatdagi sessiyasida so‘z yuritgan.
“Nimaga hokimlik yopiq joy bo‘lishi kerak? Men viloyat hokimligiga chaqirilgan hokimlarni har safar hokimlik oldidan olib kirishni buyuraman, nimaga? Hokimlar shu tomondan kirsa, panjara yo‘qligini ko‘radi. Men hokimlik binosiga kirayotgan yo‘lda panjara yo‘q. Buni aqli yetgan tushunadi”, — deydi Zoir Mirzayev hokimliklar oldida panjara borligini tanqid qilar ekan.
Hokim sessiyada, shuningdek, viloyatdagi tashkilotlar ham panjara bilan o‘rab olinganini, xalq tashkilotga kirishi uchun bir nechta to‘siqlarni bosib o‘tishga majbur bo‘layotganini aytib, tanqid qilgan.
“Kichkinagina viloyat tashkilotlari panjara, panjaradan so‘ng yana nimalardir qo‘yib, odamlarning yo‘lini to‘sib qo‘ygan. O‘zi qo‘riqlanadigan hech narsa yo‘q, lekin panjara bilan to‘silgan. Men shunday paytda tashkilot rahbarlaridan panjara bilan kimdan nimani qo‘riqlayotganini so‘rayman. Xo‘sh, tashkilotini xalqdan qo‘riqlayaptimi?”, — deydi viloyat rahbari.
“Daryo” muxbiri viloyat hokimi tanqidiga sabab bo‘lgan panjaralar masalasini o‘rganib, ayni kunda viloyatdagi qaysi tuman hokimliklari panjara bilan to‘silgani bilan qiziqdi.
Aniqlanishicha, ayni kunda viloyatning Chiroqchi, Dehqonobod, Yakkabog‘, Shahrisabz, Kitob, Koson tumani hokimliklari panjara bilan o‘rab qo‘yilgan.
“Odamlar ongida hokimlik haligacha yopiq tashkilot degan tushuncha qolmasligi kerak”, — degan viloyat rahbari Zoir Mirzayev mazkur holatni tanqid ostiga olar ekan.
Qayd etish lozim, G‘uzor tumani hokimi Bekzod Suyunov 2021-yilning 6-fevral kuni shunday tashabbus bilan chiqib, G‘uzor hokimligini o‘rab turgan panjaralarni olib tashlagandi.
Izoh (0)