AOKAda bo‘lib o‘tgan brifingda Favqulodda vaziyatlar vazirligi axborot xizmati rahbari o‘rinbosari Samandar Hikmatullayev suvda cho‘kish bilan bog‘liq hodisalar yuzasidan ma’lumot berdi.
Qayd etilishicha, profilaktik tadbirlarga qaramasdan joriy yil 14-avgust qadar respublika bo‘yicha jami 151 nafar fuqaro cho‘kish oqibatida vafot etgan.
Ulardan 36 nafari cho‘milish oqibatida cho‘kkan bo‘lsa, 44 nafari ehtiyotsizlik va 6 nafari o‘z joniga qasd qilish oqibatida, 2 nafari jinoyat sababli va 63 nafari noma’lum sabablarga ko‘ra suvda cho‘kib vafot etgan.
Ushbu cho‘kishlarning 64 nafari, ya’ni 42,4 foizi voyaga yetmaganlarga to‘g‘ri kelmoqda.
Respublika bo‘yicha jami 2 603 ta, shundan cho‘milish taqiqlangan 2 219 ta akvatoriyalar tekshirib chiqildi, suv havzalarida 5 169 ta reyd o‘tkazilib, 92 nafar fuqaroga ma’muriy choralar ko‘rilgan.
Bundan avval Namangandagi Norin daryosida cho‘kib ketgani taxmin qilinayotgan 13 yoshli bolaning jasadi qidirilyotgani, Namangandagi Norin daryosida cho‘kayotgan uch kishining ikki nafari qutqarildi, yana birining jasadi olib chiqilgani hamda Farg‘onada eri bilan janjallashib, o‘zini Katta Farg‘ona kanaliga tashlagan 22 yoshli ayolning jasadi uch kundan so‘ng topilgani haqida xabar berilgandi.
Izoh (0)