O‘zbekiston Sanoat xavfsizligi davlat qo‘mitasi mamlakatdagi madaniyat va istirohat bog‘laridagi attraksionlarning holatiga oid ma’lumotlar bilan bo‘lishdi.
Ma’lum qilinishicha, 2019–2021-yillarda o‘tkazilgan o‘rganish natijalariga ko‘ra, bugungi kunda O‘zbekistonda 143 ta madaniyat va istirohat bog‘larida 1879 ta attraksion mavjud. Qo‘mita tomonidan mavjud attraksionlarning xavfsizlik talablariga javob berishi o‘rganilganida 582 ta nosoz, 738 ta ta’mirtalab va 175 ta qo‘lbola attraksion aniqlangan.
Texnik holati normativ talablarga javob bermaydigan attraksionlarning aksar qismi Andijon (241 ta), Namangan (229 ta), Farg‘ona (229 ta), Samarqand (145 ta) va Surxondaryo (137 ta) viloyatlari hissasiga to‘g‘ri kelgan. “So‘nggi paytlarda attraksionlar bilan bog‘liq noxush holatlarning ko‘payishiga attraksion egalarining bepisandligi va ularni o‘rnatishda maxsus ixtisoslashgan tashkilotlarning jalb qilinmagani sabab bo‘lgan. Bugungi kunga kelib ko‘rilgan choralar natijasida xavfsizlik talablariga javob beruvchi attraksionlar bo‘yicha ko‘rsatkich 20,5 foizdan 53,1 foizga yetdi”, — deyiladi xabarda.
Ma’lumot uchun, Sanoat xavfsizligi davlat qo‘mitasi Istirohat bog‘lari va attraksionlarni nazorat qilish inspeksiyasi sohaga doir xavfsizlik nazorati amalga oshadi. Inspeksiya 2019-yilda o‘z faoliyatini boshlagan. Unga qadar attraksionlar xavfsizligini nazorat qiluvchi tashkilot mavjud bo‘lmagan.
Eslatib o‘tamiz, Jizzaxda attraksion qulashi oqibatida 20 yoshli qiz halok bo‘lgan, Namangandagi ko‘ngilochar istirohat bog‘ida 18 yoshli qiz attraksionda olgan tan jarohati tufayli vafot etgandi.
Izoh (0)