Қашқадарё ҳокими Зоир Мирзаев вилоятдаги маҳаллий ҳокимликлар, халқ учун хизмат қилиши лозим бўлган ташкилотлар панжара билан ўралганини танқид қилди. Бу ҳақда «Дарё» вилоят ҳокимлиги ахборот хизмати раҳбари Аҳрор Содиқов маълум қилди.
Таъкидланишича, бу ҳақда вилоят раҳбари халқ депутатлари вилоят кенгашининг навбатдаги сессиясида сўз юритган.
«Нимага ҳокимлик ёпиқ жой бўлиши керак? Мен вилоят ҳокимлигига чақирилган ҳокимларни ҳар сафар ҳокимлик олдидан олиб киришни буюраман, нимага? Ҳокимлар шу томондан кирса, панжара йўқлигини кўради. Мен ҳокимлик биносига кираётган йўлда панжара йўқ. Буни ақли етган тушунади», — дейди Зоир Мирзаев ҳокимликлар олдида панжара борлигини танқид қилар экан.
Ҳоким сессияда, шунингдек, вилоятдаги ташкилотлар ҳам панжара билан ўраб олинганини, халқ ташкилотга кириши учун бир нечта тўсиқларни босиб ўтишга мажбур бўлаётганини айтиб, танқид қилган.
«Кичкинагина вилоят ташкилотлари панжара, панжарадан сўнг яна нималардир қўйиб, одамларнинг йўлини тўсиб қўйган. Ўзи қўриқланадиган ҳеч нарса йўқ, лекин панжара билан тўсилган. Мен шундай пайтда ташкилот раҳбарларидан панжара билан кимдан нимани қўриқлаётганини сўрайман. Хўш, ташкилотини халқдан қўриқлаяптими?», — дейди вилоят раҳбари.
«Дарё» мухбири вилоят ҳокими танқидига сабаб бўлган панжаралар масаласини ўрганиб, айни кунда вилоятдаги қайси туман ҳокимликлари панжара билан тўсилгани билан қизиқди.
Аниқланишича, айни кунда вилоятнинг Чироқчи, Деҳқонобод, Яккабоғ, Шаҳрисабз, Китоб, Косон тумани ҳокимликлари панжара билан ўраб қўйилган.
«Одамлар онгида ҳокимлик ҳалигача ёпиқ ташкилот деган тушунча қолмаслиги керак», — деган вилоят раҳбари Зоир Мирзаев мазкур ҳолатни танқид остига олар экан.
Қайд этиш лозим, Ғузор тумани ҳокими Бекзод Суюнов 2021 йилнинг 6 февраль куни шундай ташаббус билан чиқиб, Ғузор ҳокимлигини ўраб турган панжараларни олиб ташлаганди.
Изоҳ (0)