Toshkent viloyati Qibray tumanida sodir bo‘lgan qotillikning oldini olishga mas’ul bo‘lgan ichki ishlar organlari xodimlari ustidan tekshiruv tayinlandi, deya xabar bermoqda IIV matbuot kotibi Shohrux G‘iyosov.
Toshkent viloyatining Qibray tumanida yashovchi oilaning 4 nafar a’zosi va yollanma ishchi o‘ldirilgani haqida xabar berilgandi. Yaqinda “Nemolchi.uz” nashri ushbu voqea tafsilotlarini e’lon qildi.
Unda aytilishicha, qotillik oqibatida halok bo‘lgan oila a’zolari bir necha marotaba ichki ishlar organlariga ularga tahdid bo‘layotgani haqida ariza taqdim etgan. Lekin “huquqni muhofaza qilish organlari tomonidan hech qanday harakat bo‘lmagan”.
IIV matbuot xizmati ushbu qotillikning oldini olishi mumkin bo‘lgan xodimlari faoliyatiga qonuniy baho berilishini ma’lum qildi.
“Ijtimoiy tarmoqlarda 2021-yilning 29-iyul kuni Toshkent viloyatining Qibray tumani, “Istiqbol” mahallasidagi xonadonda o‘ta shafqatsizlik bilan ikki va undan ortiq shaxslarga nisbatan sodir etilgan qotillik jinoyatining oldi olinishi mumkinligi haqida turli fikr va mulohazalar tarqalmoqda.
Ma’lum qilamizki, har qanday sodir bo‘lgan og‘ir yoki o‘ta og‘ir turdagi jinoyatlarga olib keluvchi shart-sharoitlarni o‘rganish va ularni bartaraf etish, jinoyatni fosh etish bo‘yicha amalga oshiriladigan protsessual harakatlarining ajralmas qismidir.
Mazkur o‘ta og‘ir jinoyatning oldini olishga mas’ul bo‘lgan har bir mansabdor shaxsning, shu jumladan, hududiy ichki ishlar organlari xodimlarining faoliyatiga qonuniy baho beriladi”, – deyiladi xabarda.
Shuningdek, tekshiruv natijasi yuzasidan jamoatchilikka to‘liq axborot yetkazilishi ma’lum qilingan.
Eslatib o‘tamiz, holat yuzasidan Toshkent viloyati prokuraturasi tomonidan Jinoyat kodeksining 97-moddasi 2-qismi “a, j” bandlari (o‘ta shafqatsizlik bilan ikki yoki undan ortiq shaxsni qasddan o‘ldirish) bilan jinoyat ishi qo‘zg‘atilgan.
Izoh (0)