Markaziy saylov komissiyasi 5 ta siyosiy partiya vakillariga Prezident saylovida ishtirok etish uchun guvohnoma topshirdi

Markaziy saylov komissiyasi matbuot markazida O‘zbekiston Prezidenti saylovlariga bag‘ishlangan press-brifing bo‘lib o‘tdi.

Unda Markaziy saylov komissiyasi raisi Zayniddin Nizomxo‘jayev tomonidan O‘zbekiston Ekologiya partiyasi, O‘zbekiston Xalq demokratik partiyasi, Tadbirkorlar va ishbilarmonlar harakati – O‘zbekiston Liberal-demokratik partiyasi, O‘zbekiston “Milliy tiklanish” demokratik partiyasi, O‘zbekiston “Adolat” sotsial-demokratik partiyasiga O‘zbekiston Prezidenti saylovida ishtirok etish uchun guvohnoma topshirildi.

Ma’lumot uchun, Prezident saylovi 24-oktabr kuni o‘tkaziladi. Saylovga jami 300 milliard so‘m, har bir nomzodga esa 3 milliard so‘mdan ajratiladi.

Bundan avval chet eldagi O‘zbekiston fuqarolari uchun 49 ta davlatda statsionar va ko‘chma saylov uchastkalari tashkil etilishi, O‘zbekiston Prezidenti saylovlarini o‘tkazish uchun saylov okruglari tashkil etilgani hamda Maqsuda Vorisova Prezidentlik saylovida g‘alaba qozonsa, islohotlarni nimadan boshlashini ma’lum qilgani haqida xabar berilgandi.