O‘zbekistonda yo‘l qurilishi va ta’mirlash ishlariga sarflangan pulni nazorat qilish uchun “Shaffof yo‘l” onlayn axborot platformasi va uning mobil ilovasi ishga tushiriladi. Bu haqda 11-avgust kuni jamoatchilik muhokamasi uchun e’lon qilingan tegishli qaror loyihasida qayd etildi.
Hujjatga ko‘ra, avtomobil yo‘llari qurilishi bo‘yicha barcha davlat dasturlari va mahalliy dasturlar bir joyda jamlanadi va qurilishi va ta’mirlanishi rejalashtirilgan yo‘llarning barchasi onlayn-xaritada ko‘rinib turadi.
Xaritada, shuningdek, qurilish yoki ta’mirlashni amalga oshirayotgan tashkilot, sarflanayotgan mablag‘, bajarilgan ishlarning ahvolini bevosita kuzatib borish mumkin bo‘ladi. Yo‘l jamg‘armalarining barcha tushumlari real vaqt rejimida platformada “onlayn hisoblagich”da ko‘rinib turadi.
Bundan tashqari, aholida yo‘llar nosozligi, harakatlanish uchun paydo bo‘lgan muammolar haqida foto va videomurojaatlar qoldirish imkoniyati paydo bo‘ladi. Mazkur sahifa orqali kelib tushgan murojaatlar qonunda belgilangan tartibda Avtomobil yo‘llari qo‘mitasi tomonidan majburiy ko‘rib chiqiladi.
Har yili 1-dekabrgacha Qoraqalpog‘iston Respublikasi va viloyatlar avtomobil yo‘llari bosh boshqarmalari viloyat, tuman va shahar hokimliklari bilan birgalikda keyingi yilda qurilishi, ta’mirlanishi ko‘zda tutilgan barcha toifadagi yo‘l uchastkalarini oldindan aniqlash, ularni xaritaga joylash va buni keng jamoatchilikka taqdim etish amaliyotini yo‘lga qo‘yadi.
Izoh (0)