Ўзбекистонда йўл қурилиши ва таъмирлаш ишларига сарфланган пулни назорат қилиш учун «Шаффоф йўл» онлайн ахборот платформаси ва унинг мобил иловаси ишга туширилади. Бу ҳақда 11 август куни жамоатчилик муҳокамаси учун эълон қилинган тегишли қарор лойиҳасида қайд этилди.
Ҳужжатга кўра, автомобиль йўллари қурилиши бўйича барча давлат дастурлари ва маҳаллий дастурлар бир жойда жамланади ва қурилиши ва таъмирланиши режалаштирилган йўлларнинг барчаси онлайн-харитада кўриниб туради.
Харитада, шунингдек, қурилиш ёки таъмирлашни амалга ошираётган ташкилот, сарфланаётган маблағ, бажарилган ишларнинг аҳволини бевосита кузатиб бориш мумкин бўлади. Йўл жамғармаларининг барча тушумлари реал вақт режимида платформада «онлайн ҳисоблагич»да кўриниб туради.
Бундан ташқари, аҳолида йўллар носозлиги, ҳаракатланиш учун пайдо бўлган муаммолар ҳақида фото ва видеомурожаатлар қолдириш имконияти пайдо бўлади. Мазкур саҳифа орқали келиб тушган мурожаатлар қонунда белгиланган тартибда Автомобиль йўллари қўмитаси томонидан мажбурий кўриб чиқилади.
Ҳар йили 1 декабргача Қорақалпоғистон Республикаси ва вилоятлар автомобиль йўллари бош бошқармалари вилоят, туман ва шаҳар ҳокимликлари билан биргаликда кейинги йилда қурилиши, таъмирланиши кўзда тутилган барча тоифадаги йўл участкаларини олдиндан аниқлаш, уларни харитага жойлаш ва буни кенг жамоатчиликка тақдим этиш амалиётини йўлга қўяди.
Изоҳ (0)