SpaceX va Tesla asoschisi Ilon Mask AQSh Aeronavtika va kosmik fazoni tadqiq qilish milliy boshqarmasi (NASA)ga skafandrlar ishlab chiqarishda yordam berishni taklif qildi, deb yozadi Daily Mail.
NASA bosh inspektori Pol Martinning hisobotida aytilishicha, kosmik agentlik katta qiyinchiliklarga duch kelmoqda. Xususan, pandemiya va texnik muammolar, moliyaviy ta’minotni 209 million dollardan 150 million dollargacha qisqartirish oqibatida xEMU (Explorave Extravehicular Mobility Unit — “Ochiq kosmosdagi tadqiqotlarning mobil tizimi”) birinchi ikkita skafandrni tayyorlash muddatini kechiktirmoqda. Ma’lum bo‘lishicha, kechikish vaqti 20 oyga yetgan. Endi agentlikka skafandrlar 2025-yilning aprelidan keyingina yetkazib berilishi mumkin.
CNBC telekanali jurnalisti Maykl Shitz Twitter’da NASAning hisobotidan parchalarni e’lon qildi. Bu xabarga javoban Mask “Zarur bo‘lsa, SpaceX skafandrlar tayyorlab berishi mumkin” — deb yozgan.
Hujjatning yana bir iqtibosida aytilishicha, endi NASA kosmik kostyumlarining keyingi avlodi uchun texnologiyalar biryo‘la 27 xususiy kompaniya tomonidan ta’minlanadi.
Bunga javoban Mask “oshxonada oshpazlar juda ko‘pga o‘xshaydi” deb hazil qilgan.
Ta’kidlanishicha, Mask allaqachon skafandr ishlab chiqarish tajribasiga ega: SpaceX bosh direktori Dragon ekipajining missiyalarida foydalanilgan oq skafandrlar ustida shaxsan ishlagan.
Maskning aytishicha, unga va kostyum dizayneri Xose Fernandesga Dragon Crew ekipajining skafandrlarini ishlab chiqarish uchun uch yil kerak bo‘lgan. Skafandrlar Kaliforniyaning Xotorn shahrida SpaceX raketalarini saqlaydigan zavodda ishlab chiqarilgan.
Izoh (0)