Afg‘oniston prezidenti Ashraf G‘ani hamda o‘zbek, tojik va hazara jamoatlari rahbarlari 11-avgust kuni “Tolibon”ga qarshi kurashda xalq qo‘shinlariga yordam ko‘rsatish masalalari bo‘yicha muhokama o‘tkazdi. Bu haqda TOLOnews telekanaliga tayanib Asia-Plus xabar berdi.
Uchrashuv Afg‘oniston shimolidagi eng yirik shahar — hozirda “Tolibon” jangarilari qurshovida bo‘lgan Mozori-Sharifda bo‘lib o‘tdi. Ashraf G‘ani 11-avgust kuni fuqarolik reysi bilan shaharga kelgan.
Xabarga ko‘ra, uchrashuvda o‘zbek jamoatidan marshal Abdurashid Do‘stum, tojik jamoatidan Atta Muhammad Nur, hazara jamoatidan Hoji-Muhammad Mohakik ishtirok etgan. Shunisi e’tiborliki, ularning barchasi Shimoliy alyans deb ataladigan ittifoqning sobiq rahbarlari. Ular 1990-yillarda “Tolibon”ga qarshi kurashgan va 2001-yilning kuzida AQSh armiyasiga Afg‘onistonni jangarilardan ozod qilishda yordam bergan.
“Tolibon” jangarilari iyundan beri Mozori-Sharif mahallalariga bostirib kirishga urinib kelmoqda. Oxirgi kunlarda “Tolibon” qo‘shni viloyatlarning ma’muriy markazlari — Juzjon, Saripul, Samangan va Qunduzni o‘z nazoratiga olganidan keyin vaziyat ayniqsa og‘irlashdi.
10-avgustdan 11-avgustga o‘tar kechasi “Tolibon” Afg‘oniston shimolida joylashgan yana ikkita viloyatning ma’muriy markazini: Badaxshondagi Fayzobod va Bag‘lonning Puli Xumrini egallab oldi. Shuningdek, Tojikiston bilan chegaradosh Badaxshon viloyati ham “Tolibon” qo‘lida.
Ayni paytda, Qatar poytaxti Dohada 10-avgustdan boshlab Afg‘oniston hukumati va “Tolibon” delegatsiyalari o‘rtasida AQSh, Rossiya va Xitoy kabi bir qator manfaatdor davlatlar diplomatlari vositachiligida uch kunlik maslahatlashuvlar o‘tkazilmoqda. Ular Afg‘oniston hududlarida jangovar harakatlarni to‘xtatish to‘g‘risida maslahatlashmoqda.
Avvalroq “Tolibon” Afg‘oniston hududining 65 foizini nazorat qilayotgani haqida xabar berildi. Ushbu xabardan so‘ng AQSh Prezidenti Jo Bayden Afg‘oniston hukumatini vatan uchun kurashishga chaqirdi.
Izoh (0)