AQSh Prezidenti Jo Bayden Afg‘oniston hukumatini vatan uchun kurashishga chaqirdi. “Tolibon” jangarilari Afg‘onistonning 65 foizini nazorat qilayotgani haqidagi xabarlardan so‘ng Bayden shunday bayonot bergan, deb yozadi Reuters.
“Afg‘oniston rahbarlari birlashishi kerak, ular o‘zi uchun, vatani uchun kurashishi kerak”, — dedi Bayden Oq uyda jurnalistlarga. Shuningdek, u Afg‘oniston hukumati qo‘shinlari “Tolibon”dan ko‘proqligini eslatib o‘tdi.
Bayden Afg‘onistondan qo‘shinlarni olib chiqish qaroridan afsuslanmasligini aytib, Vashington o‘tgan 20 yil ichida 1 trillion dollardan ko‘proq mablag‘ sarflagani va bu mamlakatda qoldirgan minglab qo‘shinlaridan ayrilgani haqida gapirdi. Uning so‘zlariga ko‘ra, AQSh afg‘on kuchlariga yirik aviayordamlar, oziq-ovqat va uskunalar yuborishda, shuningdek, maosh to‘lashda davom etmoqda.
AQSh Afg‘oniston hukumat qo‘shinlarini qo‘llab-quvvatlash maqsadida bir nechta havo hujumlarini ham uyushtirdi. AQSh Mudofaa vazirligi matbuot kotibi Jon Kirbining ma’lum qilishicha, zarbalar “Tolibon”ga “dinamik” ta’sir ko‘rsatgan, biroq Kirbi bu yordamning cheklanganini tan oldi.
“Hech kim aviazarbalar quruqlikdagi vaziyatga bog‘liq hamma muammolarni hal qiladigan yechim, deya da’vo qilmagan. Biz hech qachon bunday demaganmiz”, — dedi Kirbi.
11-avgustga o‘tar kechasi Afg‘oniston shimoli-sharqidagi Badaxshon viloyati markazi Fayzobod shahri “Tolibon” tomonidan qo‘lga olindi.
“Kecha tunda mujohidlarning hal qiluvchi va tizimli operatsiyasida Badaxshon viloyati markazi Fayzobod qo‘lga olindi. Mujohidlar gubernator qarorgohini, politsiya shtabini, razvedka idorasini va barcha davlat idoralarini nazorat qilmoqda”, — deya Twitter’da xabar qoldirgan “Tolibon” matbuot kotibi Zabiulla Mujohid.
Mujohidning xabariga ko‘ra, so‘nggi uch kun ichida mamlakatdagi 34 viloyat markazining to‘qqizinchisi “Tolibon” nazoratiga o‘tgan. “Tolibon” vakilining aytishicha, hozir harakat Nimro‘z, Juzjon, Saripul, Qunduz, Tohar, Samangan, Farah, Bag‘lon va Badaxshon viloyat markazlarini nazorat qilmoqda.
O‘z navbatida, 11-avgust kuni ertalab Afg‘oniston Mudofaa vazirligi markazining xabar berishicha, mamlakat janubidagi Helmand viloyati markazi Lashkargoh shahri chekkasida Afg‘oniston milliy armiyasining mamlakat havo kuchlari ko‘magida o‘tkazgan qo‘shma operatsiyalari chog‘ida “Tolibon”ning 42 jangarisi yo‘q qilingan, yana 6 kishi yaralangan.
Bu orada Afg‘oniston prezidenti Muhammad Ashraf G‘ani “Tolibon”ga qarshi kurashish uchun mamlakat shimoli-g‘arbidagi Balx viloyatining markazi Mozori Sharifga keldi. Mahalliy OAV Afg‘oniston prezidenti 11-avgust kuni ertalab kutilmagan tashrif bilan Mozori Sharifga kelgani haqida xabar berdi. Keyinroq prezident matbuot xizmati xabarni tasdiqladi.
Tolo News xabariga ko‘ra, safar mobaynida prezidentga uning maslahatchisi, “Islom birligi” partiyasi yetakchilaridan biri Muhammad Muhakik hamrohlik qiladi.
10-avgust oqshomida Afg‘oniston sobiq vitse-prezidenti, Milliy islomiy harakat (MIHA) partiyasi yetakchisi marshal Abdurashid Do‘stum Kobuldan maxsus reys bilan Mozori Sharifga kelgandi. Marshal bilan birgalikda MIHA raisi maxsus kuchlarining bir necha yuz a’zosi Balxga kelgan. Do‘stum Afg‘oniston shimolida “Tolibon” jangarilariga qarshi kurashga rahbarlik qilishi kutilmoqda.
Izoh (0)