Latviya hukumati noqonuniy muhojirlar bilan bog‘liq vaziyat tufayli Belarus bilan chegaradosh hududlarda favqulodda holat joriy etdi. Bu haqda Meduza xabar berdi.
Xabarga ko‘ra, chegaraga tutash Ludza, Kraslava, Augshdaugav o‘lkalarida, shuningdek, Daugavpils shahrida favqulodda holat e’lon qilingan. U 11-avgustdan 10-noyabrgacha amal qiladi.
Ushbu hududlarda favqulodda holat tugamaguncha, davlat idoralari qochqin maqomini olish masalasidagi arizalarni qabul qilmaydi. Chegarachilarga chegaradan noqonuniy o‘tib kelgan odamlarni Belarusga qaytarish uchun kuch va maxsus texnikadan foydalanishga ruxsat berildi. Latviya qurolli kuchlari va politsiyasi chegarachilarga yordam beradi.
Favqulodda vaziyat — bu hukumatga davlat organlari va mahalliy o‘zini o‘zi boshqarish organlarining, jismoniy va yuridik shaxslarning huquq va erkinliklarini cheklash, shuningdek, ularga qo‘shimcha majburiyatlar yuklash imkonini beradigan maxsus huquqiy rejim.
Latviya bosh vazir Krishyanis Karinish va ichki ishlar vaziri Mariya Golubeva bunday qat’iy choralar ko‘rilishiga izoh berar ekan, noqonuniy muhojirlar oqimi Yevropa Ittifoqi mamlakatlariga e’lon qilingan “gibrid urush” ekanini aytdi.
Birgina o‘tgan 24 soat ichida Latviya va Belarus chegarasida 200 dan ortiq odam hibsga olindi — bu butun 2020-yildagiga qaraganda 7 baravar ko‘p.
Latviyaga qo‘shni Litvada iyul oyining oxiridan beri favqulodda holat rejimi amal qilmoqda. Mamlakat Belarus bilan chegarada to‘siq qurishni boshlagan. Shuningdek, Litva hukumati o‘z ixtiyori bilan mamlakatni tark etishga rozi bo‘lgan noqonuniy muhojirlarga 300 yevrodan to‘lashga va’da bermoqda.
Belarus va Yevropa Ittifoqi chegarasidagi migratsion inqiroz Aleksandr Lukashenkoning Minsk endi Yevropani muhojirlardan himoya qilmoqchi emasligini aytganidan keyin boshlandi. Shundan so‘ng, ommaviy axborot vositalarida xabar berilishicha, belaruslik chegarachilar chegarani noqonuniy kesib o‘tmoqchi bo‘lgan odamlarga jiddiy to‘sqinlik qilmaslik haqida yashirin ko‘rsatma olgan.
Izoh (0)