Туркманистонда уйига интернет улашдан олдин фуқаролар VPN хизматларидан фойдаланмасликка Қуръон билан қасам ичиши шарт. Бу ҳақда «Озодлик радиоси»нинг туркман хизматига таяниб «Коммерсантъ» хабар берди.
Қайд этиш керакки, Туркманистонда фуқароларнинг интернетга уланиши ниҳоятда чекланган. Мамлакатда ижтимоий тармоқ саҳифалари ва VPN сайтлари блокланган. Пул эвазига телефонларга VPN ўрнатган усталар ҳибсга олинган.
«Ўтган йили мен уйимга интернет улаш учун навбатга ёзилдим. Менинг навбатим бир ярим йилдан кейин келди. Wi-Fi’ни олишдан олдин жуда кўп ҳужжатларга имзо чекдим. Энди улар мендан VPN ишлатмаслигим тўғрисида Қуръонга қасам ичишимни талаб қилмоқда. VPN’сиз интернетда бирорта сайт очилмайди. Мен нима қилишгаям ҳайронман», — дея Туркманистон фуқаросининг сўзларини келтирди «Озодлик». Фуқаронинг фамилияси ошкор қилинмаган.
Хабарда қайд этилишича, Туркманистонда фуқароларнинг қасам ичиш амалиёти кенг тарқалган, бироқ бундан олдин улар Қуръон билан эмас, «Руҳнома» китоби билан қасам ичган. Ушбу китоб муаллифи мамлакатнинг биринчи президенти Сапармурод Ниёзов экани эълон қилинганди.
Изоҳ (0)