Афғонистон молия вазири вазифасини бажарувчи Холид Паинда «Толибон» ҳужумларининг кучайиши фонида босим ортиши туфайли мамлакатни тарк этди. Бу ҳақда ТОLОNews манбаларга таяниб хабар берди.
Молия вазирлигидан келган мактубдан маълум бўлишича, бундан атиги етти ой олдин иш бошлаган Паинда расмий ташриф доирасида мамлакатни тарк этган. Молия вазирининг ўрнини унинг ўринбосари эгаллаб турибди. Бироқ телеканал манбаларининг таъкидлашича, молия вазирининг ўзи қайтиб келмайди.
Афғонистон Миллий Ассамблеяси қуйи палатасининг молия ва бюджет қўмитасида таъкидланишича, президентнинг атрофида Молия вазирлигига ўз одамларини кўтаришга уринаётганлар бор.
ТОLОNews суҳбатдошлари Паинданинг кетишини мамлакатнинг чегара ҳудудларидаги тўққизта асосий шаҳар «Толибон» назоратига ўтгани билан боғлади. Чунки ушбу шаҳарларнинг эгалланиши давлат даромадларининг икки баравар камайишига олиб келган. Аммо парламент вакилларининг айтишича, «Толибон» ҳужумидан олдин ҳам Молия вазирлигидаги тайинловлар даромадларнинг қисқаришига олиб келган.
Аввалроқ Reuters Европа Иттифоқидаги манбага таяниб, «Толибон» бугунги кунда Афғонистон ҳудудининг 65 фоизини назорат қилаётгани ҳақида хабар берди. Июлда «Толибон» Афғонистон чегарасининг 90 фоизини ўз назоратига олганини маълум қилганди.
АҚШ ҳарбий разведкасининг тахминига кўра, «Толибон» 90 кун ичида Афғонистон пойтахти Кобулни эгаллаб олиши мумкин. Июнь ойида АҚШ разведкаси Афғонистон ҳукумати АҚШ қўшинлари олиб кетилганидан олти ой ўтгач қулаши мумкинлигини айтганди. «Толибон»нинг Афғонистондаги муваффақиятлари фонида АҚШ разведкаси ўз прогнозини оғирлаштирди.
Изоҳ (0)