Jamoaviy immunitetga erishish ilojsiz, “Sputnik V” o‘zini to‘liq oqladi, chekish antitanalar miqdorini kamaytiradi. Koronaxabarlar

Jons Hopkins universiteti ma’lumotlariga ko‘ra, dunyoda koronavirusga chalinganlar soni 204 027 000 kishini tashkil qilmoqda, vafot etganlar esa 4 314 598 kishiga yetdi. Kasallanganlar soni bo‘yicha AQSh (36 million kishi), Hindiston (32 million), Braziliya (20,2 million), Fransiya (6,407 million) va Rossiya (6,404 million) eng oldinda bormoqda.

Shuningdek, so‘nggi 28 kun ichida 16 151 732 kishida virus aniqlangan, 257 814 kishi vafot etgan. Bu davrdagi kasallanish holatlari bo‘yicha AQSh (2,1 million), Indoneziya (1,1 million), Braziliya (1 million) yetakchilik qilmoqda.

Oksford universitetining vaksinalar yaratish bo‘yicha guruhi rahbari professor Endryu Pollard koronavirusning delta shtammi tarqalayotgan bir paytda jamoaviy immunitetga erishib bo‘lmasligini ma’lum qildi. AstraZeneca ishlab chiqaruvchisi emlanganlar orasida ko‘proq tarqaladigan yangi shtamm paydo bo‘lishini kutmoqda.

“Biz hozirgi shtamm bilan bog‘liq vaziyatdamiz, bunda jamoaviy immunitetning imkoni yo‘q, chunki bu shtamm emlanganlarga ham yuqmoqda. Fikrimcha, virus bizga yangi shtammni tashlaydi, u, ehtimol, emlanganlar orasida yanada ko‘proq tarqaladi”, — deya ma’lum qildi Pollard koronavirus bo‘yicha Britaniya partiyalararo parlament guruhiga. U vaksinatsiya dasturini jamoaviy immunitet atrofiga qurmaslikka chaqirdi.

Endryu Pollardning ta’kidlashicha, qizamiq kasalligi bilan bog‘liq vaziyatda aholining 95 foizini emlash orqali kasallikni to‘xtatish mumkin. Delta shtamm esa emlanganlarga ham yuqishi mumkin.

“Ikki vektorli komponentlar bilan emlash o‘zini oqladi. Biroq bu yerda qandaydir bashorat haqida gap ketmayapti, shunchaki jamoamizda Ebola va MERS (Middle East respiratory syndrome-related coronavirus — 2012—2013-yillarda pandemiyani keltirib chiqargan Yaqin Sharq sindromi)ga qarshi avvalgi vaksinalar bo‘yicha tajriba bor edi. Bir yil ichida ‘Sputnik V’ o‘zini to‘liq oqladi”, — dedi Ginsburg.

U o‘zining “Sputnik V” haqidagi prognozlari ro‘yobga chiqqanini qayd etdi.

“Hammasi ro‘yobga chiqayotgani kishini hayratda qoldiradi. Biz prezidentga bergan hisobotda aytgan hamma narsa, barcha prognozlar amalga oshmoqda. Va vaksinaning ushbu konstruksiyasi bugungi kunda eng optimal va yuqori samarali bo‘lib chiqishi borasidagi taxminlar ham to‘liq amalga oshmoqda”, — deya aniqlik kiritdi Ginsburg.

Nima sababdan boshqa vektorli vaksinalar COVID-19’ga qarshi samarasizroq bo‘lib chiqqani haqida gapirar ekan, Ginsburg: “Birinchidan, ularda busting (kuchaytirish) yo‘q”, — dedi.

“Shuni ham aytishdan qo‘rqmaymanki, bizning mamlakatda ‘Sputnik V’ uchun qo‘llaniladigan komponentlarni tozalash darajasi boshqa mamlakatlardagi vektorli vaksinalar ishlab chiqaruvchilari qo‘llaydigan tozalash texnologiyasidan ustunroq”, — dedi akademik.

Mutaxassislar koronavirusga qarshi Pfizer vaksinasining ikkinchi komponenti bilan emlanganidan keyin uch oy o‘tib, 378 nafar tibbiy xodimning qon namunalarini tekshirdi. Shu tariqa, ekspertlar COVID-19’ga nisbatan himoya antitanalarining titrlari miqdorini aniqlamoqchi edi. Tahlil chog‘ida kasalliklar tarixi, yosh va zararli odatlar haqidagi ma’lumotlar hisobga olingan.

Keyinchalik olimlar chekuvchilar va hech qachon chekmaganlarning tahlillarini qiyoslab ko‘rdi. Aniqlanishicha, birinchi guruhning qonidagi antitanalar konsentratsiyasi, jinsdan qat’i nazar, normadan 140-250 taga kamroq. Shuningdek, keksa ko‘ngillilarda IgG miqdori eng kam bo‘lgan.

Immunologlar shunday xulosaga keldiki, chekishdan voz kechish koronavirusga qarshi vaksinaning individual samaradorligini yaxshilashi mumkin: zararli odatdan voz kechganlarda hujayra immuniteti mustahkamroq.

• Portugaliyada 12-15 yoshli o‘smirlarni koronavirusga qarshi emlashga ruxsat berildi. Statistikaga ko‘ra, mamlakatda bu yoshdagi o‘smirlar soni taxminan 400 mingni tashkil etadi. Bu borada uzoq vaqt bahs-munozara olib borilgan, ammo oxir-oqibat Yevroittifoq va AQShdagi tadqiqotlarga tayangan holda vaksinalarni qo‘llash imkoniyati haqida qaror qabul qilindi.
• Gruziya hukumati mamlakatda COVID-19 tarqalishi kuchaygani tufayli niqob rejimini qaytadan joriy qildi. 10-avgustdan ochiq va yopiq makonlarda, besh kishidan ortiq odam to‘planganida niqob taqish shart bo‘ladi. Shuningdek, umumiy ovqatlanish obyektlarida ma’rakalar, to‘ylar va yubileylar o‘tkazish taqiqlangan bo‘lib, bu cheklovni buzganlik uchun birinchi marta obyekt egasi 3 ming dollar jarimaga tortiladi, ikkinchi martada esa obyekt xatlanadi.