Жонс Ҳопкинс университети маълумотларига кўра, дунёда коронавирусга чалинганлар сони 204 027 000 кишини ташкил қилмоқда, вафот этганлар эса 4 314 598 кишига етди. Касалланганлар сони бўйича АҚШ (36 миллион киши), Ҳиндистон (32 миллион), Бразилия (20,2 миллион), Франция (6,407 миллион) ва Россия (6,404 миллион) энг олдинда бормоқда.
Шунингдек, сўнгги 28 кун ичида 16 151 732 кишида вирус аниқланган, 257 814 киши вафот этган. Бу даврдаги касалланиш ҳолатлари бўйича АҚШ (2,1 миллион), Индонезия (1,1 миллион), Бразилия (1 миллион) етакчилик қилмоқда.
Оксфорд университетининг вакциналар яратиш бўйича гуруҳи раҳбари профессор Эндрю Поллард коронавируснинг дельта штамми тарқалаётган бир пайтда жамоавий иммунитетга эришиб бўлмаслигини маълум қилди. AstraZeneca ишлаб чиқарувчиси эмланганлар орасида кўпроқ тарқаладиган янги штамм пайдо бўлишини кутмоқда.
«Биз ҳозирги штамм билан боғлиқ вазиятдамиз, бунда жамоавий иммунитетнинг имкони йўқ, чунки бу штамм эмланганларга ҳам юқмоқда. Фикримча, вирус бизга янги штаммни ташлайди, у, эҳтимол, эмланганлар орасида янада кўпроқ тарқалади», — дея маълум қилди Поллард коронавирус бўйича Британия партиялараро парламент гуруҳига. У вакцинация дастурини жамоавий иммунитет атрофига қурмасликка чақирди.
Эндрю Полларднинг таъкидлашича, қизамиқ касаллиги билан боғлиқ вазиятда аҳолининг 95 фоизини эмлаш орқали касалликни тўхтатиш мумкин. Дельта штамм эса эмланганларга ҳам юқиши мумкин.
«Спутник V» вакцинасининг конструкцияси бугунги кунда COVID-19’га қарши курашда энг оптимал ва юқори самарали ҳисобланади. Бу ҳақда Гамалея номидаги Эпидемиология ва микробиология миллий тадқиқот маркази директори, Россия Фанлар академияси академиги Александр Гинсбург маълум қилди.«Икки векторли компонентлар билан эмлаш ўзини оқлади. Бироқ бу ерда қандайдир башорат ҳақида гап кетмаяпти, шунчаки жамоамизда Эбола ва MERS (Middle East respiratory syndrome-related coronavirus — 2012—2013 йилларда пандемияни келтириб чиқарган Яқин Шарқ синдроми)га қарши аввалги вакциналар бўйича тажриба бор эди. Бир йил ичида ‘Спутник V’ ўзини тўлиқ оқлади», — деди Гинсбург.
У ўзининг «Спутник V» ҳақидаги прогнозлари рўёбга чиққанини қайд этди.
«Ҳаммаси рўёбга чиқаётгани кишини ҳайратда қолдиради. Биз президентга берган ҳисоботда айтган ҳамма нарса, барча прогнозлар амалга ошмоқда. Ва вакцинанинг ушбу конструкцияси бугунги кунда энг оптимал ва юқори самарали бўлиб чиқиши борасидаги тахминлар ҳам тўлиқ амалга ошмоқда», — дея аниқлик киритди Гинсбург.
Нима сабабдан бошқа векторли вакциналар COVID-19’га қарши самарасизроқ бўлиб чиққани ҳақида гапирар экан, Гинсбург: «Биринчидан, уларда бустинг (кучайтириш) йўқ», — деди.
«Шуни ҳам айтишдан қўрқмайманки, бизнинг мамлакатда ‘Спутник V’ учун қўлланиладиган компонентларни тозалаш даражаси бошқа мамлакатлардаги векторли вакциналар ишлаб чиқарувчилари қўллайдиган тозалаш технологиясидан устунроқ», — деди академик.
Чекиш коронавирусга қарши эмлангандан кейин организмда антитаналар миқдорини камайтиради. Япониянинг Докке ва Жичи университетлари олимлари эмланган тиббиёт ходимларининг қон намуналарини текшириб, шундай хулосага келди.Мутахассислар коронавирусга қарши Pfizer вакцинасининг иккинчи компоненти билан эмланганидан кейин уч ой ўтиб, 378 нафар тиббий ходимнинг қон намуналарини текширди. Шу тариқа, экспертлар COVID-19’га нисбатан ҳимоя антитаналарининг титрлари миқдорини аниқламоқчи эди. Таҳлил чоғида касалликлар тарихи, ёш ва зарарли одатлар ҳақидаги маълумотлар ҳисобга олинган.
Кейинчалик олимлар чекувчилар ва ҳеч қачон чекмаганларнинг таҳлилларини қиёслаб кўрди. Аниқланишича, биринчи гуруҳнинг қонидаги антитаналар концентрацияси, жинсдан қатъи назар, нормадан 140-250 тага камроқ. Шунингдек, кекса кўнгиллиларда IgG миқдори энг кам бўлган.
Иммунологлар шундай хулосага келдики, чекишдан воз кечиш коронавирусга қарши вакцинанинг индивидуал самарадорлигини яхшилаши мумкин: зарарли одатдан воз кечганларда ҳужайра иммунитети мустаҳкамроқ.
Шунингдек:- Португалияда 12-15 ёшли ўсмирларни коронавирусга қарши эмлашга рухсат берилди. Статистикага кўра, мамлакатда бу ёшдаги ўсмирлар сони тахминан 400 мингни ташкил этади. Бу борада узоқ вақт баҳс-мунозара олиб борилган, аммо охир-оқибат Евроиттифоқ ва АҚШдаги тадқиқотларга таянган ҳолда вакциналарни қўллаш имконияти ҳақида қарор қабул қилинди.
- Грузия ҳукумати мамлакатда COVID-19 тарқалиши кучайгани туфайли ниқоб режимини қайтадан жорий қилди. 10 августдан очиқ ва ёпиқ маконларда, беш кишидан ортиқ одам тўпланганида ниқоб тақиш шарт бўлади. Шунингдек, умумий овқатланиш объектларида маъракалар, тўйлар ва юбилейлар ўтказиш тақиқланган бўлиб, бу чекловни бузганлик учун биринчи марта объект эгаси 3 минг доллар жаримага тортилади, иккинчи мартада эса объект хатланади.
Изоҳ (0)