“Misli ko‘rilmagan tabiiy ofat”: Gretsiyada o‘rmon yong‘inlari davom etmoqda (foto)

Gretsiyada bir necha kundan buyon yirik o‘rmon yong‘inlari davom etmoqda. Yong‘inlar anomal issiqlik fonida boshlandi — ayrim hududlarda havo harorati 47 darajagacha ko‘tarildi. Elid va Attikaning markaziy hududlarida, shuningdek, mamlakatning eng mashhur sayyohlik joylaridan biri bo‘lgan Evbeya orolida o‘rmonlar shiddat bilan yonmoqda. Yong‘inlar oqibatida bir necha kishi halok bo‘lgan, o‘nlab odamlar jarohatlangan. Eng ko‘p zarar ko‘rgan hududlarda minglab aholi evakuatsiya qilindi. Hukumat butun mamlakat bo‘ylab o‘rmonga kirishni taqiqladi, taqiqni buzganlar 1000 yevro miqdorida jarimaga solinishi mumkin.

Avgust oyining birinchi haftasida Gretsiyada jami 150 dan ortiq faol yong‘in o‘chog‘i qayd etilgan. Mamlakatda 56 ming gektardan ortiq maydon yonib ketgan. O‘t qo‘yishda gumonlanib bir necha kishi hibsga olingan.

Gretasiyaning ko‘plab hududlarida, shu jumladan, Afina va Kritda yong‘in davom etishi xavfi saqlanib qolmoqda. Mamlakat oxirgi 30 yil ichida eng kuchli issiqni boshdan kechirmoqda.

Hukumat nafas qisilishi bor odamlar uchun ishonch telefonini o‘rnatdi. Gretsiya va Yevropa Ittifoqi rasmiylari yong‘inlarni iqlim o‘zgarishining ta’siri deb atadi. Yevropa Ittifoqi Gretsiya va O‘rta Yer dengizi bo‘yidagi boshqa mamlakatlarga o‘rmon yong‘inlarini o‘chirishda yordam berish uchun o‘zining fuqaro muhofazasi mexanizmidan foydalandi.

Gretsiya bosh vaziri Kiriakos Mizotakis mamlakat xalqiga murojaatida yong‘inlar uchun uzr so‘radi.

“Avvalo, barcha xatolar uchun uzr so‘rayman. Men uyi yoki mol-mulki qanday yonganini ko‘rgan vatandoshlarimizning qayg‘usini to‘liq tushunaman”, — dedi hukumat rahbari.

Mizotakis o‘z murojaatida so‘nggi kunlarda mamlakatda 586 yong‘in sodir bo‘lganini aytdi va bu kunlarni Gretsiya uchun eng qiyin kunlardan biri deb atadi. “Biz bor kuchimiz bilan kurashdik va kurashishda davom etmoqdamiz. Ammo biz misli ko‘rilmagan darajada tabiiy ofatga duch keldik ”, — dedi u.

Uning ta’kidlashicha, hukumat yong‘in oqibatida vayron bo‘lgan uylar uchun kompensatsiya to‘laydi, o‘rmonlar ham tiklanadi, buning uchun budjetdan qo‘shimcha 500 million yevro ajratilgan. Bosh vazirning so‘zlariga ko‘ra, inson hayotini saqlab qolish — eng muhim vazifa. “Biz tishni tishga bosib, oldinga siljishimiz kerak”, — deb xulosa qildi u.