Hatto bir qator mamlakatlarda vaksinatsiya boshlanganiga qaramay, 2021-yilda koronavirusga nisbatan jamoaviy immunitet paydo bo‘lmaydi. Bu haqda Jahon sog‘liqni saqlash tashkiloti (JSST) bosh ilmiy xodimi Sumiya Svaminatan ma’lum qildi, deb yozadi “RBK”.

Sumiya Svaminatan.

Foto: Reuters

“Hattoki vaksinalar kasallikka tez chalinuvchan odamlarni himoya qilishni boshlaganida ham, biz 2021-yilda ommaviy immunitetning qandaydir darajasiga yeta olmaymiz”, — dedi Svaminatan.

Uning so‘zlariga ko‘ra, agar jamoaviy immunitet bir nechta mamlakatlarda paydo bo‘lsa, “bu butun dunyodagi odamlarni himoya qilmaydi”.

Ayni vaqtda Svaminatan vaksinalarni ishlab chiqishda “hayratlanarli natija”ga erishilganini ma’lum qildi. “Bir yilgina avval hech kim bizda koronavirusga qarshi bir emas, biryo‘la bir nechta vaksina bo‘lishini tasavvur ham qila olmasdi. Va ular barcha mamlakatlarga yetib boradi, ammo biz sabrli bo‘lishimiz kerak”, — dedi ekspert.

Citi Research tahlilchilari prognoziga ko‘ra, koronavirusga nisbatan jamoaviy immunitet dunyoda 2021-yil oxiriga kelibgina shakllanishni boshlaydi. Ular shunday xulosaga keldiki, rivojlangan bozorlar vaksinalarga oldindan buyurtmalarning 85 foizini ta’minlagan. AQSh, Buyuk Britaniya, Yaponiya, Kanada, Avstraliya va Yevroittifoq mamlakatlari o‘z aholisining ehtiyojlaridan ortiqroq miqdorda dori buyurtma qilgan. Bu shuni bildiradiki, u yerda vaksinalarning ommaviy tarqalishi ikkinchi yoki uchinchi chorakda boshlanadi, jamoaviy immunitet esa 2021-yilning so‘nggi uch oyida shakllanishi mumkin. Iqtisodiyoti rivojlanayotgan mamlakatlarda esa vaksinatsiya 2022-yilda yoki undan keyinroq boshlanishi mumkin, deb prognoz qiladi Citi Research.

Avvalroq AQSh bosh infeksionisti Entoni Fauchi koronavirus infeksiyasiga nisbatan jamoaviy immunitet hosil bo‘lishi uchun aholining 85 foizgacha bo‘lgan qismi emlanishi kerakligini ma’lum qilgan edi.