“Tolibon” radikal harakati AQShning Afg‘onistonda o‘tish davri hukumatini shakllantirish taklifini qabul qilmaslikka qaror qildi, bu haqda “RIA Novosti”ga guruh rasmiy vakili Zabiulla Mujohid ma’lum qildi.
Iyul oxirida “Tolibon” vakillari AQSh va Yevropa davlatlari delegatsiyalari bilan uchrashuvda Afg‘onistondagi ziddiyatni tinch yo‘l bilan hal qilish masalasini muhokama qilgan edi. Amerika tomoni jangarilarga muvaqqat hukumat shakllantirilishini ko‘zda tutuvchi mexanizmni taklif qilgan, u, AQSh fikricha, mamlakatda tinchlikka tezkorlik bilan erishish imkonini berishi kerak edi.
“Hozircha bu masala ko‘tarilmadi. Lekin umuman olganda, biz o‘tish davri hukumatini qabul qilmaymiz. Biz fundamental yechimni talab qilamiz va u topilishi kerak. O‘tish davri hukumatini shakllantirish — bizning rejamiz emas”, — deya javob qildi Mujohid “Tolibon” AQSh taklifini qabul qiladimi degan savolga.
Shuningdek, Mujohidning aytishicha, Kobulni egallab olish haqidagi qaror Afg‘onistonning boshqa hududlari ustidan nazorat o‘rnatilganidan keyingina qabul qilinadi.
Avvalroq Rossiya prezidentining Afg‘oniston bo‘yicha maxsus vakili Zamir Kabulov “Tolibon” ishtirokidagi yangi o‘tish davri hukumatiga asosan Kobuldagi joriy hukumat qarshi chiqayotganini aytgandi. Shuningdek, unga ko‘ra, na “Tolibon” va na Afg‘onistonning joriy rahbariyati mamlakatni yolg‘iz boshqarishga qodir emas.
Bu orada “Tolibon” jangarilari Afg‘oniston g‘arbida, Eron bilan chegarada joylashgan Farah viloyatining shu nomli shahrini hamda shimoldagi Bag‘lon viloyatining markazi — Puli-Xumri shahrini egallab oldi. Shu tariqa, so‘nggi besh kun ichida “Tolibon” nazorati ostiga o‘tgan Afg‘oniston viloyatlari ma’muriy markazlari soni sakkiztaga yetdi.
“Tolibon” harakati Afg‘oniston hududining 80 foizini nazorat qilishini da’vo qilmoqda.
BMT ma’lumotlariga ko‘ra, so‘nggi bir oy ichida “Tolibon” jangarilarining hujumlari oqibatida Afg‘oniston tinch aholisining mingdan ortig‘i halok bo‘lgan.
Izoh (0)