Фотогалерея. Беш йил кутилган Токио—2020 Олимпиадасининг энг ёрқин суратлари
Токио—2020 Олимпиадаси 23 июлдан 8 августга қадар бўлиб ўтди. Коронавирус пандемияси сабаб спортчилар ва мухлислар Олимпиадани бир йил кўпроқ кутишга мажбур бўлди. Мазкур Олимпиаданинг энг ёрқин ва диққатга сазовор суратлари жамланди. Қуйида улар билан танишинг.
Япония рамзларидан бири ҳисобланган Фудзияма тоғлари атрофида ўтказилаётган елканли қайиқлар пойгасида иштирок этаётган британиялик Саския Тиди ва Шарлотт Добсон. Бу йўналишда бразилиялик спортчилар ғолиб бўлди.Фото: Getty Images
АҚШ гимнастика терма жамоаси етакчиси, тўрт карра Олимпиада чемпиони Симона Байлс омадсиз чиқишдан кейин жамоавий кўпкураш бўйича финал баҳсларини тарк этди. Байлс бу қарорини «ўзининг руҳий ҳолатини тиклашга эътибор қаратиш» истагида экани билан изоҳлади. Спортчи яккалик мусобақаларда брусдаги машқлар ва таяниб сакрашдан воз кечди. Бироқ шундай бўлса-да, хода устида машқ йўналишида иштирок этди. Байлс пайдо бўлганда зал уни олқишлар билан кутиб олди ва якунда спортчи бронза медалини қўлга киритди.Фото: AFP
Фаолиятидаги саккизинчи Олимпиадасида қатнашган Оксана Чусовитина Токиодаги иштирокини саралашдаёқ тугатди ва олқишлар остида катта спортдаги фаолиятини якунлади.Фото: Getty Images
Нидерландиялик Матё ван дер Пул маунтинбайк бўйича фаворитлардан бири эди. Бироқ у Олимпиадада муваффақиятсиз ҳаракат қилди ва ҳатто совриндорлар қаторига кира олмади. Ушбу спорт турида британиялик Томас Пидкок ғолиб бўлди.Фото: AP Photo
Қиличбозликнинг сабля йўналиши вакиллари Арон Силадйи (Венгрия) ва Луижи Самеле (Италия) жамоавий баҳслар ярим финалида. Бу икки спортчи яккалик мусобақаси финалида ҳам тўқнаш келганди. Жамоавий мусобақаларда Жанубий Корея вакиллари ғолиб бўлди, италияликлар кумушга эга чиққан бўлса, венгерлар бронзани қўлга киритди.Фото: Getty Images
Япониялик ака-сингил дзюдочилар Ҳифуми Абе ва Ута Абе бир соатлик фарқ билан иккита олтин медални қўлга киритди.Фото: Getty Images
Токио Олимпиадасида тарихда илк бор сёрфинг бўйича беллашувлар ўтказилди. Суратда учинчи ўрин учун кечаётган баҳсда кураш олиб бораётган бразилиялик Габриэль Медина. У бронзани австралиялик Оуэн Райтга бой бериб қўйди. Сёрфинг бўйича Олимпиаданинг илк чемпиони бразилиялик Итало Феррейра бўлди.Фото: AFP
Дзюдо бўйича +100 кг вазн тоифаси вакиллари япониялик Хишаёши Харасава ва чехиялик Лукаш Крпалек ярим финалда. Крпалек финалда грузиялик Гурам Тушишвилини мағлуб этиб, икки карра Олимпия чемпионига айланди. Польшалик спортчи чорак финалда Ўзбекистон вакили Бекмурод Олтибоевни қийинчилик билан мағлуб этганди.Фото: Reuters
Баҳодир Жалолов финалда АҚШ вакили Ричард Торресни мағлубиятга учратди. Жалолов Торресни 2019 йилги Жаҳон чемпионатида кучли нокаутга учратганди, бу сафар эса Баҳодир нокдаун билан чекланди.Фото: Getty Images
Эркаклар ўртасида 100 метрга югуриш мусобақалари доим қизиқарли курашларга бой бўлган. Токиодаги Олимпиадада ҳам ушбу анъана сақланиб қолди. Италиялик Марсель Жейкобс Олимпия чемпионига айланди. Жейкобс 20 йил деганда ушбу мусобақада ғолиб чиққан дастлабки европалик ва тарихдаги илк итальян бўлди.Фото: Getty Images
Британиялик Том Дейли 10 метр баландликдан сувга синхрон шўнғиш мусобақасида олтин медалга эга чиқди. Шунингдек, унинг трибунада ўз итига жемпер тўқиб ўтириши тасвирланган сурат ҳам машҳур бўлди.Фото: PA
Эркаклар ўртасида баландликка сакраш мусобақасида кумуш медал эгасиз қолди. Қатарлик Мутаз Баршим ва италиялик Жанмарко Тамбери бир хил имкониятда, бир хил натижа (2,37 метр) қайд этди. Улар ўзаро келишувга кўра қўшимча курашда иштирок этмайдиган бўлди ва ташкилотчилар икки спортчига ҳам олтин медал тақдим этди.Фото: Reuters
Изоҳ (0)