Tojikistonning Afg‘oniston chegarasidan 20 kilometr uzoqlikda joylashgan “Xarb-Maydon” poligonida Rossiya, O‘zbekiston va Tojikistonning 2,5 ming harbiy xizmatchisi ishtirokidagi qo‘shma mashg‘ulotlari yakunlandi. Bu haqda Rossiya Markaziy harbiy okrugi qo‘shinlari qo‘mondoni general-polkovnik Aleksandr Lapinga tayanib, “TASS” xabar berdi.
“Tojikiston, O‘zbekiston va Rossiya qurolli kuchlari ishtirokidagi qo‘shma mashg‘ulotarni yakunlayapmiz. Birinchi bor Suriyada to‘plangan tajribalar asosida keng miqyosli aviatsiya kuchlarning turlararo guruhi, razvedka va o‘t ochish komplekslari hamda desantlaridan foydalanildi”, — deydi Lapin.
Uning ta’kidlashicha, o‘quv mashg‘ulotlari Afg‘onistondagi vaziyatning keskinlashuvi va radikal terrorchilik guruhlarining Markaziy Osiyo mamlakatlari chegarasida xavf tug‘dirayotgani fonida o‘tkazilgan. “Kelajakdagi hamkorlikdagi harakatlar jangovar birdamligimizni mustahkamlashga, mamlakatlarimizni jangovar tajovuzlardan himoya qilishga yordam berishiga ishonaman”, — deydi MHO qo‘mondoni.
Tojikiston mudofaa vaziri general-polkovnik Sherali Mirzoning ta’kidlashicha, uchta mamlakat harbiylari ishtirokidagi bu kabi aksilterrorchilik mashg‘ulotlari birinchi bor o‘tkazilgan.
O‘zbekiston Qurolli kuchlari bosh shtabi boshlig‘i general-polkovnik Shuhrat Xolmuhamedov ham Afg‘onistondagi vaziyatdan xavotirda ekanini bildirgan: “Vaziyat bizdan muntazam ogohlikni va jangovar tayyorgarlikni ushlab turishni talab etmoqda”.
Uch mamlakat ishtirokidagi o‘quv mashg‘ulotlarida jami 2,5 ming harbiy xizmatchi ishtirok etgan bo‘lib, ularning 1,8 mingi rossiyalik harbiylardir.
Avvalroq Tojikiston, O‘zbekiston va Rossiya qo‘shinlari ishtirokidagi uch tomonlama mashg‘ulotlar 5-avgustdan 10-avgustgacha davom etishi to‘g‘risida xabar berilgandi. 2-avgust kuni O‘zbekiston Mudofaa vazirligi bo‘linmasi mashg‘ulot o‘tkaziladigan joyga kolonnada yurishni amalga oshirgan. Qo‘shni davlat hududida kolonnada yurishlarga O‘zbekiston havo kuchlarining “Mi-35” jangovar vertolyotlari hamrohlik qilgan.
Izoh (0)