Тожикистоннинг Афғонистон чегарасидан 20 километр узоқликда жойлашган «Харб Майдон» полигонида Россия, Ўзбекистон ва Тожикистоннинг 2,5 минг ҳарбий хизматчиси иштирокидаги қўшма машғулотлари якунланди. Бу ҳақда Россия Марказий ҳарбий округи қўшинлари қўмондони генерал-полковник Александр Лапинга таяниб, «ТАСС» хабар берди.
«Тожикистон, Ўзбекистон ва Россия қуролли кучлари иштирокидаги қўшма машғулотарни якунлаяпмиз. Биринчи бор Сурияда тўпланган тажрибалар асосида кенг миқёсли авиация кучларнинг турлараро гуруҳи, разведка ва ўт очиш комплекслари ҳамда десантларидан фойдаланилди», — дейди Лапин.
Унинг таъкидлашича, ўқув машғулотлари Афғонистондаги вазиятнинг кескинлашуви ва радикал террорчилик гуруҳларининг Марказий Осиё мамлакатлари чегарасида хавф туғдираётгани фонида ўтказилган. «Келажакдаги ҳамкорликдаги ҳаракатлар жанговар бирдамлигимизни мустаҳкамлашга, мамлакатларимизни жанговар тажовузлардан ҳимоя қилишга ёрдам беришига ишонаман», — дейди МҲО қўмондони.
Тожикистон мудофаа вазири генерал-полковник Шерали Мирзонинг таъкидлашича, учта мамлакат ҳарбийлари иштирокидаги бу каби аксилтеррорчилик машғулотлари биринчи бор ўтказилган.
Ўзбекистон Қуролли кучлари бош штаби бошлиғи генерал-полковник Шуҳрат Холмуҳамедов ҳам Афғонистондаги вазиятдан хавотирда эканини билдирган: «Вазият биздан мунтазам огоҳликни ва жанговар тайёргарликни ушлаб туришни талаб этмоқда».
Уч мамлакат иштирокидаги ўқув машғулотларида жами 2,5 минг ҳарбий хизматчи иштирок этган бўлиб, уларнинг 1,8 минги россиялик ҳарбийлардир.
Аввалроқ Тожикистон, Ўзбекистон ва Россия қўшинлари иштирокидаги уч томонлама машғулотлар 5 августдан 10 августгача давом этиши тўғрисида хабар берилганди. 2 август куни Ўзбекистон Мудофаа вазирлиги бўлинмаси машғулот ўтказиладиган жойга колоннада юришни амалга оширган. Қўшни давлат ҳудудида колоннада юришларга Ўзбекистон ҳаво кучларининг «Ми-35» жанговар вертолётлари ҳамроҳлик қилган.
Изоҳ (0)