Namangan viloyatining Kosonsoy tumanida 150 yillik ko‘hna masjid o‘rniga yangisi barpo etilmoqda. Bu haqda “Daryo” muxbiri Azizbek Abduvaliyev xabar bermoqda.
Tumanning “Tagijar” mahallasida joylashgan “Eshonbobo” masjidi keyingi yillarda nurab, binoga putur yetishni boshlagandi. Qolaversa, bor-yo‘g‘i 120 kishiga mo‘ljallangani bois keyingi paytlarda namozxonlar ichkariga sig‘may, janoza, juma va hayit namozlari ko‘chada ham o‘qilayotgandi.
“Bu joylar zax bo‘lgani sababli masjidni balandlikka, katta yo‘l yoqasiga ko‘chirishga qaror qilindi. 2019-yil iyul oyida qurilish boshlandi. Katta homiylarimiz yo‘q, hashar yo‘li bilan barpo etilyapti. Loyihasi ajoyib va ko‘rinishi nihoyatda go‘zal bo‘lgani uchun hali bitmasidan turib Farg‘ona va Andijon, Samarqand va Jizzaxdan ham kelib ko‘rib ketishyapti”, — deydi mahalla oqsoqoli Xoshimjon Oxunov.
Ushbu masjidni loyihalashtirgan Adhamjon Umarov shu paytgacha respublikaning turli viloyatlarida 150 dan ortiq masjidning qurilishiga bosh-qosh bo‘lgan. Endi o‘zi tug‘ilib-o‘sgan yurt oldidagi qarzni o‘tash fursati ham keldi.
“Masjidimiz qurilishida dinimizga oid sana va raqamlar uyg‘un bo‘lib boryapti. Binoning diametri 30 metr — Qur’onning 30 porasiga monand. Asosiy gumbazning balandligi 27 metr, Qadr kechasini yodimizga soladi. Yonidagi to‘rtta kichik gumbaz to‘rt xalifaga ishora. Bo‘lajak minoraning balandligi payg‘ambarimiz yashab o‘tgan yillarga qiyosan 63 metr. Unga olib chiqadigan zinalar esa Qur’on suralari soni bilan bir xil — 114 ta”, — deydi Adhamjon Umarov.
Umarovning aytishicha, yangi masjidga ayvonlari bilan qo‘shib hisoblaganda 5 ming kishi sig‘adi. Uning asosiy gumbazi diametri qariyb 15 metr bo‘lib, titan qoplamasi Rossiyaning Krasnodar o‘lkasidan keltirilgan. Qoplama qayerga ishlatilishidan xabar topgan o‘sha yerdagi tadbirkorlar yo‘l xarajatlari va bojxona to‘lovlarini ham zimmasiga olishibdi.
“Kosonsoy ahli masjid qurilishi uchun juda katta hissa qo‘shyapti. Kimdir sement, kimdir yog‘och yoki armatura. Hatto to‘rt tup teragidan ikkitasini berib, nega ishlatmayapsizlar deya xafa bo‘layotganlar bor. Naql qilinishicha, masjid uchun bitta sham yoqqan kishiga to o‘sha shami o‘chguniga qadar farishtalar istig‘for aytib, ajri qiyomatga qadar borar ekan. Masjid 60-70 foizga bitib qoldi, Insha Alloh, bir yil ichida ko‘chib o‘tamiz. Uzoq vaqt mobaynida xalqimizga xizmat qilsin. O‘zi kamida 500 yilni niyat qilib qurilyapti bu bino”, — deydi “Eshonbobo” jome masjidi imom-xatibi Ibodullo Usmonov.
Ma’lumot uchun, bugungi kunda Kosonsoy tumanida 18 masjid faoliyat olib bormoqda. Ulardan ikkitasi mukammal ta’mirlanyapti, uchtasi, jumladan, “Eshonbobo” masjidi yangitdan qurilmoqda.
Izoh (0)