Moskvada barcha chet el fuqarolari orasida eng ko‘p O‘zbekiston va Tojikiston fuqarolari soxta haydovchilik guvohnomasidan foydalanadi va shu bilan birga, ular taksichilik faoliyati bilan shug‘ullanadi. Bu haqda huquq -tartibot idoralaridagi manbasiga tayanib, “TASS” xabar berdi.
“Politsiya xodimlari soxta haydovchilik guvohnomalariga qarshi muntazam ravishda, shu jumladan, chet elliklar orasida ham kurash olib bormoqda. Poytaxt bo‘ylab qalbaki hujjatlar bilan harakatlanadigan muhojirlar orasida bugun O‘zbekiston fuqarolari yetakchi. Aniqlangan soxta hujjatlar soni bo‘yicha Tojikiston haydovchilari ikkinchi o‘rinda turibdi”, — dedi agentlik manbasi. Turkmaniston va Qirg‘iziston fuqarolaridan soxta haydovchilik guvohnomalarini olib qo‘yish holatlari kamroq uchraydi.
“Bunday qalbaki hujjatlar taksi haydovchilari o‘rtasida o‘tkazilgan reydlar paytida har doim aniqlanadi, bu ayniqsa, tashvish uyg‘otmoqda, chunki bunday holatlarda yo‘l harakatining barcha qatnashchilari xavf ostida qoladi”, — deya qo‘shimcha qildi manba.
Uning aniqlik kiritishicha, hujjatlarni qalbakilashtirish bilan odatda haydovchilik guvohnomasidan mahrum qilingan yoki umuman guvohnomasi bo‘lmaganlar shug‘ullanadi. Soxtalashtirish bo‘yicha barcha holatlar yuzasidan politsiya jinoiy ish qo‘zg‘atadi (Rossiya Federatsiyasi Jinoyat kodeksining 327 -moddasi – “Soxtalashtirish, soxta hujjatlarni tayyorlash yoki ularni aylantirish”).
Avvalroq Moskva ma’muriy avtomagistral inspeksiyasi taksi kompaniyalaridan xorijiy haydovchilik guvohnomasiga ega va tajribasi bo‘lmagan haydovchilar bilan shartnomalarni to‘xtatishni talab qilgandi. Xususan, Moskvada O‘zbekiston haydovchilik guvohnomasi bilan taksichilik qilish taqiqlanadi.
Izoh (0)