Москвада барча чет эл фуқаролари орасида энг кўп Ўзбекистон ва Тожикистон фуқаролари сохта ҳайдовчилик гувоҳномасидан фойдаланади ва шу билан бирга, улар таксичилик фаолияти билан шуғулланади. Бу ҳақда ҳуқуқ -тартибот идораларидаги манбасига таяниб, «ТАСС» хабар берди.
«Полиция ходимлари сохта ҳайдовчилик гувоҳномаларига қарши мунтазам равишда, шу жумладан, чет элликлар орасида ҳам кураш олиб бормоқда. Пойтахт бўйлаб қалбаки ҳужжатлар билан ҳаракатланадиган муҳожирлар орасида бугун Ўзбекистон фуқаролари етакчи. Аниқланган сохта ҳужжатлар сони бўйича Тожикистон ҳайдовчилари иккинчи ўринда турибди», — деди агентлик манбаси. Туркманистон ва Қирғизистон фуқароларидан сохта ҳайдовчилик гувоҳномаларини олиб қўйиш ҳолатлари камроқ учрайди.
«Бундай қалбаки ҳужжатлар такси ҳайдовчилари ўртасида ўтказилган рейдлар пайтида ҳар доим аниқланади, бу айниқса, ташвиш уйғотмоқда, чунки бундай ҳолатларда йўл ҳаракатининг барча қатнашчилари хавф остида қолади», — дея қўшимча қилди манба.
Унинг аниқлик киритишича, ҳужжатларни қалбакилаштириш билан одатда ҳайдовчилик гувоҳномасидан маҳрум қилинган ёки умуман гувоҳномаси бўлмаганлар шуғулланади. Сохталаштириш бўйича барча ҳолатлар юзасидан полиция жиноий иш қўзғатади (Россия Федерацияси Жиноят кодексининг 327 -моддаси – «Сохталаштириш, сохта ҳужжатларни тайёрлаш ёки уларни айлантириш»).
Аввалроқ Москва маъмурий автомагистрал инспекцияси такси компанияларидан хорижий ҳайдовчилик гувоҳномасига эга ва тажрибаси бўлмаган ҳайдовчилар билан шартномаларни тўхтатишни талаб қилганди. Хусусан, Москвада Ўзбекистон ҳайдовчилик гувоҳномаси билан таксичилик қилиш тақиқланади.
Изоҳ (0)