Jons Hopkins universiteti ma’lumotlariga ko‘ra, dunyoda koronavirusga chalinganlar soni 202 780 177 kishiga yetdi, shularning 4 295 418 nafari vafot etgan. Kasallanganlar soni bo‘yicha AQSh (35,7 million kishi), Hindiston (31,9 million), Braziliya (20,1 million), Rossiya (6,38 million) va Fransiya (6,37 million) yetakchilik qilmoqda.
Yaqin yillar ichida koronavirus mavsumiy shamollashga aylanadi, u odamlarda yengil shaklda va simptomsiz kechadi, hammasidan ustun keluvchi shtamm paydo bo‘lganidan keyin esa uning evolyutsiyasi sekinlashadi. Bu haqda Noridj tibbiyot maktabi professori Pol Xanter ma’lum qildi.
Xanterning fikricha, odamlar COVID-19’ga chalinishda davom etadi. Uning so‘zlariga ko‘ra, vaksinalar virus tarqalishini vaqtinchalik to‘xtatib turadi, ammo tezda ularning samaradorligi, umuman olganda, pasayadi. Ammo shu bilan birga, emlanish kasallikning og‘ir kechishi va o‘limlar oldini oladi. “Jamoaviy immunitetga hech qachon erishilmaydi, biroq biz immunitet va infeksiyalar o‘rtasidagi boshqariluvchi muvozanatni topamiz”, — deb hisoblaydi britaniyalik professor.
Uning fikriga ko‘ra, hukmron shtamm paydo bo‘lganidan keyin virusning tezkor mutatsiyasi sekinlashadi. “Delta shtamm shunday hukmron turga aylanishi mumkin”, — dedi u.
Eronda 8-avgust holatiga, o‘tgan bir kecha-kunduzda 542 kishi COVID-19 oqibatida vafot etgan — bu ushbu mamlakatda pandemiya boshidan buyon kuzatilgan eng yuqori ko‘rsatkich.Worldometer statistik sayti ma’lumotlariga ko‘ra, kunlik o‘lim holatlari bo‘yicha bundan avvalgi maksimal ko‘rsatkich 2020-yil noyabrida qayd etilgan, o‘shanda 483 kishi vafot etgan edi.
Shu tariqa, Eronda koronavirus qurbonlarining umumiy soni 94 mingga yetdi.
Bundan tashqari, mamlakatda bir kunda 39 619 ta kasallanish holati aniqlandi, shularning 4,1 ming nafari kasalxonaga yotqizilgan.
Eronda butun pandemiya davrida jami 4,1 million kishida virus qayd etilgan.
Xitoyning Uxan shahrida 11,28 milliondan ortiq fuqarodan koronavirusga test olindi, bu shaharning deyarli butun aholisi demakdir. Shuncha odamni testdan o‘tkazish uchun to‘rt kun kerak bo‘ldi.PZR-test yordamida to‘qqiz kishida virus aniqlandi, ularning barchasi karantinga yuborildi.
Xitoy hukumati mamlakatda infeksiya tarqalishini to‘xtata olmayapti. Xitoy Sog‘liqni saqlash davlat qo‘mitasining ma’lumotlariga ko‘ra, 8-avgust kuni Xitoyda 125 kishida koronavirus aniqlangan, ulardan 94 nafari mamlakat ichida: Xenan provinsiyasida — 41, Szyansu viloyatida — 38, Xunan viloyatida — 12, va Xubey viloyatida — 3 kishi.
8-avgust kuni Isroilda koronavirus bilan bog‘liq yangi cheklovlar kuchga kirdi. Hukumat shu tariqa delta shtammning tarqalishini sekinlashtirishga urinmoqda. Endi Isroilda ochiq joylarda odamlar gavjum paytda niqob taqish majburiy bo‘ldi.Chora-tadbirlar COVID-19’ga qarshi vaksina olgani, virus bilan kasallanib o‘tgani yoki yaqinda manfiy natijali test topshirgani isbotini taqdim eta olmaydigan odamlar uchun yopiq inshootlarga kirish cheklanishini nazarda tutadi.
Ochiq havoda, 100 dan ortiq odam to‘planadigan joylarda niqob taqish talab qilinadi. Ish joylarida xodimlar soni ko‘pi bilan 50 foiz etib cheklanadi. Qoidalarga rioya qilinishini politsiya nazorat qilib boradi.
Izoh (0)