Turkmaniston prezident Gurbanguli Berdimuhamedov 2-avgust kuni etraplar va viloyatlar hokimlari bilan yig‘ilish o‘tkazdi, unda davlat rahbariga paxta yetishtirish bo‘yicha ishlarning borishi haqida hisobot berildi. Bu haqda “Xronika Turkmenistana” xabar qilgan.
Yig‘ilishda hududlar rahbarlari kartoshka va boshqa sabzavotlarni yetishtirish bo‘yicha ishlar, qishloq xo‘jaligi texnikasining samaradorligi, ijarachilarning dala ekinlari bilan ta’minlanganligi, mamlakat mustaqilligining 30 yilligi munosabati bilan qurilayotgan obyektlar haqida ma’lumot bergan. Berdimuhamedov fevral oyida ham olimlarga kartoshka hosildorligini oshirishni buyurgandi.
Berdimuhamedov hokimlarning hisobotlarini eshitib, barcha amaldorlarga aholiga yil davomida mahalliy qishloq xo‘jaligi mahsulotlari, meva-sabzavotlar va boshqa oziq-ovqat mahsulotlarini yetkazib berish, shuningdek, paxta hosili rejasini Turkmaniston mustaqilligining 30 yilligi, ya’ni 27-sentabrgacha bajarish yuzasidan topshiriqlar bergan.
“Ayni vaqtda asosiy maqsad — ushbu muhim sanaga qadar davlatga paxtani topshirish bo‘yicha shartnoma majburiyatlarini bajarish”, — degan Gurbanguli Bedimuhamedov.
O‘tgan yillarda viloyatlarda paxta hosilini yig‘ib olish ishlari Turkmanistonda sentabrning birinchi yarmida boshlanardi. Odatda Gurbanguli Berdimuhamedovga paxtani davlatga topshirish rejasi bajarilishining dastlabki natijalari haqida oktabr oxiri, noyabr boshlarida hisobot beriladi. 2020-yilda rejaning bajarilgani haqida 5-noyabrda hisobot berilgan. Shuningdek, 2020-yili koronavirus pandemiyasiga qaramay talabalar paxta terimiga jalb qilingandi.
“Xronika Turkmenistana” nashri yer ijarachilari bilan suhbatlashgan va ularning so‘zlariga ko‘ra, Turkmanistonda paxta hosili quruq iqlim va suvning kamayib ketishi oqibatida kech shonalagan, shuningdek, paxta hosilini tezroq yetiltirish, uni yig‘ib olish uchun qishloq xo‘jaligi texnikasi yetishmaydi.
Izoh (0)