Хитойнинг Ухань шаҳри ҳукумати ҳудудда яшовчи аҳолидан коронавирусга тест олмоқчи, дея хабар берди Reuters.
Мазкур қарорга шаҳарда коронавирус тарқалиши билан боғлиқ бир қатор локал ҳолатлар кузатилгани сабаб бўлган, бу бир йил ичида илк бор содир бўлаётган ҳолатлар, дея қайд этган Associated Press.
Global Times нашри хабарига кўра, шаҳарда вирус юқтириб олиш билан боғлиқ еттита локал ҳолат кузатилган; касалланиш шаҳарда ишловчи меҳнат муҳожирларида қайд этилган, деб ёзмоқда AFP.
COVID-19 инфекциясини юқтириб олиш билан боғлиқ янги ҳолатлар сабаб Уханда мактаблар ёпилган ва метрога тушаётган йўловчиларни текшириш ишлари кучайтирилган. Шаҳарда касалланган муҳожирлар яшаган ҳудуддаги бир нечта бекат ёпилган. Ҳудуднинг ўзида карантин жорий қилинган.
Ухань 2019 йил охирида коронавирус эпидемияси бошланган шаҳар ҳисобланади, COVID-19 аста-секин бошқа ҳудудлар, кейинчалик бутун дунёга тарқалган. 2020 йил ёзида 11 миллиондан зиёд аҳоли яшайдиган Ухандаги ҳаммадан коронавирусга тест олинган.
Гарчи коронавирус пандемияси илк бор Хитойда бошланган бўлса ҳам мамлакат кескин чекловлар ва фаол эмлаш ишлари туфайли вазиятни тез ўнглашга муваффақ бўлди. Бугунги кунгача Хитойда 150 мингта касалланиш ҳолати қайд этилган. Таққослаш учун, АҚШда 35 миллион аҳолида COVID-19 инфекцияси юқтириб олиш ҳолатлари кузатилган, мамлакат бу борада бутун дунёда етакчи бўлиб турибди.
Июль бошида бутун дунёда дельта штамм тарқалаётгани оқибатида Хитойда ҳам COVID-19 билан касалланган беморлар кўпая бошлади. Коронавирус юқтириб олиш ҳолатлари туфайли Хитойнинг бир нечта шаҳарларида аэропортлар ёпилди, поездлар ҳаракати чекланди ва карантин жорий этилди. Нанкин шаҳрида деярли барча аҳоли, яъни 8,7 миллион кишидан коронавирусга тест олинди.
Изоҳ (0)