AQSh asosiy harbiy kemalar va amfibiya-desant kuchlaridan foydalangan holda, LSE 2021 (Large Scale Exercise 2021) global miqyosli uyushgan dengiz mashg‘ulotlarini boshladi. Bu haqda AQSh harbiy-dengiz kuchlariga tayanib “Interfaks” xabar berdi.
AQSh harbiylarining ma’lumotlariga ko‘ra, 16-avgustgacha davom etadigan LSE 2021 mashg‘ulotlari “dushman kuchlariga qarshi kurashish bo‘yicha global ssenariyga asoslangan”.
Qayd etilishicha, LSE 2021 AQSh harbiy-dengiz kuchlarining sovuq urush davridan buyon o‘tkazgan eng yirik mashg‘ulotlaridir. Bunday miqyosdagi mashqlar oxirgi marta 1981-yilda o‘tkazilgan. Shu bilan birga, hozirgi mashg‘ulotlar aynan o‘sha paytdagi kabi “strategik raqobat sharoitida NATOning qat’iyatliligi va AQShning imkoniyatlarini namoyish etishi” kerakligi ta’kidlanmoqda.
AQSh harbiy-dengiz kuchlarida qayd etilishicha, mashg‘ulotlar dushmanlarga Amerika flotining bir vaqtning o‘zida bir nechta urush sahnalarida muvofiqlashtirilgan operatsiyalar o‘tkazish imkoniyatlarini ko‘rsatishi kerak.
Uyushgan mashg‘ulotlarga 36 ga yaqin harbiy kemalar, shu jumladan, samolyot tashuvchilar, raketa kreyserlari, esminetslar, zarba beruvchi suvosti kemalari va yirik hujum kemalari, shuningdek, kemalar va dengiz aviatsiyasi, beshta operatsion flot va uchta dengiz piyodalari ekspeditsion diviziyasidan tashkil topgan bo‘linmalar jalb qilingan. Mashg‘ulotlarda jami 25 mingdan ziyod harbiy xizmatchi qatnashmoqda.
AQSh harbiy-dengiz kuchlarining global mashqlari bir vaqtning o‘zida 17 ta vaqt zonasida bo‘lib o‘tadi.
Amerika harbiy nashrlarida qayd etilishicha, Amerika dengiz guruhlari va amfibiya-desant qo‘shinlarining so‘nggi 40 yildagi eng yirik global uyushgan mashg‘ulotlari AQShning Rossiya va Xitoyga har qanday agressiyaga bir vaqtning o‘zida bir necha jabhalarda, jumladan, Qora dengiz, Sharqiy O‘rta Yer dengizi, Janubiy Xitoy va Sharqiy Xitoy dengizlarida javob berishi mumkinligini ko‘rsatishi lozim.
Mavzuga doir:
Izoh (0)