Xalqaro valyuta jamg‘armasi (XVJ) koronavirus pandemiyasidan keyin jahon iqtisodiyotini tiklash uchun 650 milliard dollar ajratishni ma’qulladi. Bu haqda tashkilot saytida xabar berilgan.
“2-avgust kuni XVJ boshqaruvchilar kengashi dunyoning likvidlik resurslarini ko‘paytirish uchun umumiy 650 milliard dollarga teng bo‘lgan SDR (special drawing rights — maxsus o‘zlashtirish huquqlari) ajratilishini ma’qulladi”, — deyiladi xabarda.
XVJning boshqaruvchi direktori Kristalina Georgiyeva SDRning joriy taqsimotini XVJ tarixidagi eng yirik deb atadi.
SDRlarni taqsimlash to‘g‘risidagi qaror 23-avgustdan kuchga kiradi. XVJga a’zo davlatlar o‘z kvotalariga mutanosib ravishda qarz olish uchun ariza berishi mumkin bo‘ladi. Shu bilan birga, rivojlanayotgan mamlakatlar uchun qariyb 275 milliard dollar ajratilgan.
“Pandemiyadan so‘ng qayta tiklanish, barqaror va bir tekis o‘sishga erishish uchun a’zo davlatlar bilan birgalikda SDRni boyroq mamlakatlardan kambag‘alroq va himoyasizroq davlatlarga o‘tkazishning maqbul usullarini topish ustida ish olib bormoqdamiz”, — deyiladi XVJ veb-saytida.
XVJ jahon iqtisodiyoti 2021-yilda 6 foizga, 2022-yilda esa 4,9 foizga o‘sishini kutmoqda.
Mavzuga doir:
Izoh (0)