Rossiyada majburiy mehnatga jalb qilingan va jarohatlangan fuqarolar O‘zbekistonga olib kelindi, deya xabar bermoqda Tashqi mehnat migratsiyasi agentligi.
Qayd etilishicha, 2021-yilning aprel oyida andijonlik L.K. turmush o‘rtog‘i K.K. bilan birgalikda Rossiyaning Samara shahridagi issiqxonada ishlash maqsadida ketgan. Ish jarayonida ish beruvchi tomonidan fuqarolarning shaxsini tasdiqlovchi hujjatlari (pasportlari) olib qo‘yilib, 3 oydan ortiq muddatda majburiy mehnatga jalb qilingan.
Fuqarolarning murojaatiga asosan tezkor tartibda mahalliy ichki ishlar idoralari jalb qilinib, ularning pasportlari olib berildi va vaqtincha yashash uchun xostelga joylashtirildi.
Bundan tashqari, fuqaro U.D. 2021-yilning may oyida Novosibirsk shahriga ishlash maqsadida ketib, avtomobillarga texnik xizmat ko‘rsatish sohasida ishlash jarayonida baxtsiz hodisaga uchrab, shifoxonaga joylashtirilgan. Shifokorlarning tibbiy muolajasi natijasida chap qo‘li barmoqlari amputatsiya qilingan va mehnatga layoqatsiz bo‘lib qolgan.
Shuningdek, yana bir andijonlik Q.K. oilasidagi moliyaviy qiyinchilik sabab Rossiyaga 2021-yilning may oyida ishlash maqsadida ketgan. Dastlab Moskva shahriga borib, ish topolmagach Samara shahriga borgan. Samarada ham ish topolmay, Magadan shahriga ketgan. Fuqaro pandemiya davrida ish topolmagani, koronavirus kasalligini yuqtirib olgani sababli ruhiy tushkunlikka va murakkab moliyaviy ahvolga tushib qoladi.
Yuqoridagi fuqarolar Xorijda mehnat faoliyatini amalga oshiruvchi fuqarolarni qo‘llab-quvvatlash hamda ularning huquq va manfaatlarini himoya qilish jamg‘armasi mablag‘lari hisobidan 4-avgust kuni Qozon—Toshkent, Novosibirsk—Toshkent, Magadan—Novosibirsk—Toshkent yo‘nalishida O‘zbekistonga qaytarildi.
Bundan avval Senat Rossiyaga ishlash uchun ketgan o‘zbekistonliklarning videomurojaati yuzasidan o‘rganish natijalarini e’lon qilgani, O‘zbekistonda 1-sentabrdan boshlab mehnat migratsiyasiga ketayotgan fuqarolarga kompensatsiya to‘lanishi hamda Rossiyada ikki oyog‘idan ayrilib, xotirasini qisman yo‘qotgan ayol O‘zbekistonga qaytarilgani haqida xabar berilgandi.
Izoh (0)