Qashqadaryo viloyatida sud jarayonini yoritish istagini bildirgan blogerlar ko‘pincha sudyalarning qarshiligiga, “hujjatingiz yo‘qligi sababli sudni tasvirga olishingizga ruxsat berolmaymiz”, qabilidagi javobga duch keladi. Shunday to‘siqqa uchrayotgan blogerlar nima qilishi kerak? Qashqadaryo viloyat sudi raisi o‘rinbosari O‘tkir Mamadaliyev shunga aniqlik kiritdi, deya xabar berdi “Daryo” muxbiri.
Ta’kidlanishicha, bu haqda Qarshi shahridagi Jurnalistlar uyida viloyat sudi mas’ullari ishtirokida bo‘lib o‘tgan matbuot anjumanida so‘z borgan.
Matbuot anjumanida so‘z olgan “Daryo” muxbiri viloyatda faoliyat olib boruvchi blogerlar sud jarayonlarini yoritishda muammoga duch kelayotganini, blogerligini tasdiqlovchi guvohnomasi yo‘qligi ro‘kach qilinib, sudga kamerasiz yoki videotasvirga olish mo‘ljallangan telefonsiz kirishi kerakligi talab qilinayotganini aytib, “bugungi kunda blogerlar ham OAV vakili, demakki, sudda jurnalistning tasvirga olishiga ruxsat etilgach, bu imkoniyat blogerga ham berilishi kerakmasmi? Afsuski, viloyatda faoliyat yurituvchi sudyalar bunday vaziyatga duch kelganda, blogerning tasvirga olish huquqini tan olmayapti. Bunday paytda blogerlar nima qilishi kerak?”, — deya savol berdi.
Mazkur savolga javob berishga uringan Qashqadaryo viloyat sudi raisi Abduqayum Mahkamov aniq javob berishdan tiyilib, gapni olib qochdi. Javob OAV vakillarini qoniqtirmagach, savolga uning o‘rinbosari O‘tkir Mamadaliyev aniqlik kiritdi.
“To‘g‘ri, bu muammo kuzatilmoqda. Odatda sudga borgan blogerning hujjati bo‘lmagani sabab u sudga oddiy kuzatuvchi fuqaro sifatida kiritilmoqda. Biroq blogerlarga qarata shuni aytmoqchimizki, mayli sud binosiga kirishda Milliy gvardiya xodimi sizning fotokamera olib kirishingizga qarshilik qilsa-da, sud jarayoni boshlangach, sudyaga iltimosnoma kiritgan jurnalistlarga fotokameradan foydalanishga ruxsat etilsa, siz ham bloger ekaningizni sudga bildirib, bu imkoniyatdan foydalanishingiz mumkin. Bunga haqingiz bor”, — dedi O‘tkir Mamadaliyev.
Eslatib o‘tamiz, avvalroq qashqadaryolik bloger Otabek Ortiqov sud jarayonini yoritish maqsadida Jinoyat ishlari bo‘yicha Shahrisabz tuman sudiga borganida, undan blogerligini tasdiqlovchi hujjatini so‘rashgani, hujjati bo‘lmagani bois sud jarayonini kamera olishga mo‘ljallangan telefonini olib qo‘yishgani haqida yozgandi.
Izoh (0)