Россияда мажбурий меҳнатга жалб қилинган ва жароҳатланган фуқаролар Ўзбекистонга олиб келинди, дея хабар бермоқда Ташқи меҳнат миграцияси агентлиги.
Қайд этилишича, 2021 йилнинг апрель ойида андижонлик Л.К. турмуш ўртоғи К.К. билан биргаликда Россиянинг Самара шаҳридаги иссиқхонада ишлаш мақсадида кетган. Иш жараёнида иш берувчи томонидан фуқароларнинг шахсини тасдиқловчи ҳужжатлари (паспортлари) олиб қўйилиб, 3 ойдан ортиқ муддатда мажбурий меҳнатга жалб қилинган.
Фуқароларнинг мурожаатига асосан тезкор тартибда маҳаллий ички ишлар идоралари жалб қилиниб, уларнинг паспортлари олиб берилди ва вақтинча яшаш учун хостелга жойлаштирилди.
Бундан ташқари, фуқаро У.Д. 2021 йилнинг май ойида Новосибирск шаҳрига ишлаш мақсадида кетиб, автомобилларга техник хизмат кўрсатиш соҳасида ишлаш жараёнида бахтсиз ҳодисага учраб, шифохонага жойлаштирилган. Шифокорларнинг тиббий муолажаси натижасида чап қўли бармоқлари ампутация қилинган ва меҳнатга лаёқатсиз бўлиб қолган.
Шунингдек, яна бир андижонлик Қ.К. оиласидаги молиявий қийинчилик сабаб Россияга 2021 йилнинг май ойида ишлаш мақсадида кетган. Дастлаб Москва шаҳрига бориб, иш тополмагач Самара шаҳрига борган. Самарада ҳам иш тополмай, Магадан шаҳрига кетган. Фуқаро пандемия даврида иш тополмагани, коронавирус касаллигини юқтириб олгани сабабли руҳий тушкунликка ва мураккаб молиявий аҳволга тушиб қолади.
Юқоридаги фуқаролар Хорижда меҳнат фаолиятини амалга оширувчи фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси маблағлари ҳисобидан 4 август куни Қозон—Тошкент, Новосибирск—Тошкент, Магадан—Новосибирск—Тошкент йўналишида Ўзбекистонга қайтарилди.
Бундан аввал Сенат Россияга ишлаш учун кетган ўзбекистонликларнинг видеомурожаати юзасидан ўрганиш натижаларини эълон қилгани, Ўзбекистонда 1 сентябрдан бошлаб меҳнат миграциясига кетаётган фуқароларга компенсация тўланиши ҳамда Россияда икки оёғидан айрилиб, хотирасини қисман йўқотган аёл Ўзбекистонга қайтарилгани ҳақида хабар берилганди.
Изоҳ (0)