Salar kanali bo‘yida va shu nomli suv tozalash inshooti atrofidagi ishlab chiqarish binolari va kushxonalar Toshkent tashqarisiga ko‘chiriladi, deb xabar berdi poytaxt hokimligi matbuot xizmati.
Toshkent shahrida faoliyat yuritayotgan terini qayta ishlash, to‘qimachilik, parrandachilikka ixtisoslashgan korxonalar va qoramol kushxonalari Toshkent viloyatining Olmaliq shahri va Ohangaron tumanlarida tashkil etiladigan “Maxsus sanoat zona”siga ko‘chiriladi.
Bu qaror mahallalar aholisining tozalash inshooti atrofidagi murojaatlarini o‘rgangan va bu korxonalar vakillari bilan uchrashuvda e’lon qilingan muvofiqlashtiruvchi ishchi guruhining xulosalari asosida qabul qilindi.
Bundan tashqari, Salar oqova suvlarni tozalash inshooti bilan bog‘liq muammolarni bartaraf etishda amalga oshirilayotgan ishlar samaradorligini oshirish yuzasidan mas’ullarga zarur ko‘rsatmalar berildi.
Yig‘ilishda ma’lum qilinishicha, avvalgi uchrashuvlarda bu hududda badbo‘y hid taralardi. Olib borilgan keng ko‘lamli ishlar, xususan, qayta ishlanmagan oqovalar inshootga tashlanishi to‘xtatilganidan so‘ng bugungi kunda bu yerdagi yoqimsiz hid ancha kamaygan. Ammo hali ishchi guruh xulosasi asosida bajariladigan ishlar ko‘p.
May oyi o‘rtalarida 533 ta korxonaning ishlab chiqarishdan hosil bo‘lgan oqova suvlari Salar oqova suvlarni tozalash inshootiga quyilishi haqida xabar berilgan edi.
“Gazeta.uz”ning ma’lum qilishicha, Senatning Agrar, suv xo‘jaligi va ekologiya qo‘mitasi korxonalarning mahalliy tozalash inshootlarini rekonstruksiya qilish, shuningdek, beshta charm ishlab chiqarish zavodini Toshkentdan tashqariga ko‘chirish taklifi bilan hukumat qarori loyihasini ishlab chiqqani e’lon qilgan.
Bundan avval Sergeli tumani hududida kuzatilayotgan badbo‘y hid yuzasidan 22 nafar mas’ulga ma’muriy ish qo‘zg‘atilgani haqida xabar berilgandi.
Izoh (0)