Xalqaro valyuta jamg‘armasi (XVJ) jahon iqtisodiyotini tiklash uchun rekord darajadagi, ya’ni 650 milliard AQSh dollari miqdorida mablag‘ ajratishni ma’qulladi, deb xabar beradi “Dunyo” agentligi.
XVJ tarqatgan press-relizda qayd etilishicha, “Xalqaro valyuta jamg‘armasi zaxira aktivlari hisobidan 456 milliard SDR (Special Drawing Rights — maxsus qarz olish huquqlari, 650 milliard dollar) ajratadi. 275 milliard dollar rivojlanayotgan bozorlarga va mamlakatlarga beriladi”.
“Ushbu muhim qaror — XVJ tarixidagi eng yirik SDR taqsimoti va misli ko‘rilmagan inqiroz davrida global iqtisodiyot uchun yo‘naltirilgan moliyaviy ko‘mak hisoblanadi. SDR’ning taqsimlanishi barcha a’zo mamlakatlar manfaati uchun xizmat qiladi”, — deydi XVJ boshqaruvchi direktori Kristalina Georgiyeva.
Mablag‘larni ajratish to‘g‘risidagi qaror 23-avgust kuni kuchga kiradi. Mablag‘lar kvotalarga mutanosib ravishda jamg‘armaga a’zo mamlakatlarga o‘tkazib beriladi. Kvotaga muvofiq (0,116 foiz) O‘zbekiston 754 million AQSh dollari olishi mumkin.
Jamg‘arma xabarida ta’kidlanishicha, XVJ, shuningdek, yordamga o‘ta muhtoj davlatlarga tiklanish ishlarida yordam berish uchun boshqa variantlarni ham o‘rganib chiqmoqda.
XVJ jahon iqtisodiyoti 2021-yilda 6 foiz va kelgusi yilda esa 4,9 foizga o‘sishini bashorat qilmoqda.
Mavzuga doir: “O‘zbekiston tarkibiy islohotlarni jadallashtirishi kerak” — Xalqaro valyuta jamg‘armasi
Xalqaro valyuta jamg‘armasining O‘zbekistonga kredit ajratishga rozilik bergani haqida 23-aprel kuni bosh vazir o‘rinbosari — iqtisodiy rivojlanish va kambag‘allikni qisqartirish vaziri Jamshid Qo‘chqorov ma’lum qilgan edi.
Keyinroq moliya vaziri o‘rinbosari Odilbek Isoqov Xalqaro valyuta jamg‘armasi 375 million dollar miqdorida kredit ajratishda O‘zbekistonga qo‘shimcha shart qo‘ymasligini ma’lum qilgandi. Kredit ajratishda XVJ O‘zbekistondan uning ko‘magida amalga oshirilayotgan islohotlarni davom ettirishni so‘ragan.
Izoh (0)