Сурхондарёнинг «Термиз» тоғ полигонида Ўзбекистон—Россия ҳамкорлигидаги машғулотларга старт берилди. Бу ҳақда Россия Мудофаа вазирлиги матбуот хизмати хабар берди.
Тадбир икки давлат ҳарбий хизматчиларининг сафланишидан бошланган. Шундан сўнг Ўзбекистон ва Россия давлат байроқлари мадҳиялар садоси остида тантанали равишда кўтарилган.
Маросим давомида Ўзбекистон мудофаа вазирининг жанговар тайёргарлик бўйича ўринбосари полковник Қодир Турсунов ҳамда Россия Марказий ҳарбий округи штаби бошлиғининг ўринбосари генерал майор Николай Терешченко сўзга чиқиб, ҳарбийларга муваффақиятли ҳамкорлик тилаган. Улар қўшма машғулотлар икки томонлама ҳамкорликни янада мустаҳкамлашига ишонч билдирган.
Шундан кейин тадбир иштирокчилари Термиз базаси парад майдони бўйлаб юришни амалга оширган.
5 кун давом этадиган машғулотларга Россия ва Ўзбекистон қуролли кучларининг 1,5 мингга яқин ҳарбий хизматчилари жалб қилинган. Россия ҳарбий хизматчилари мезбон томонидан берилган зирҳли машиналарда вазифаларни бажаради.
Аввалроқ Тожикистонда 5—10 август кунлари Тожикистон, Ўзбекистон ва Россия қўшинлари иштирокида уч томонлама машғулотлар ўтказилиши тўғрисида хабар берилганди. 2 август куни Ўзбекистон Мудофаа вазирлиги бўлинмаси машғулот ўтказиладиган жойга колоннада юришни амалга оширган. Қўшни давлат ҳудудида колоннада юришларига Ўзбекистон ҳаво кучларининг «Ми-35» жанговар вертолётлари ҳамроҳлик қилган.
Изоҳ (0)