Qashqadaryo viloyatining Qarshi tumanida joylashgan viloyat narkologiya dispanseriga mastlikda gumonlanib, olib kelingan va bir kundan so‘ng shifoxonada vafot etgan fuqaro spirtli ichimlik ta’siridagi IIB xodimi tomonidan olib kelingani aytilmoqda. Bu haqda jurnalist Dilshod Nabiyev bilan suhbatlashgan shifoxona xodimi Isroil Norqobilov ma’lum qildi.
Ta’kidlanishicha, marhum Nursoat Muhammadiyev o‘sha kuni shifoxonaga uch kishi — “Kaptarli” MFY profilaktika inspektori Isomiddin Xolmatov, “Shirinobod” mahallasi “uchastkavoy”i katta leytenant Habib Po‘latov va uning hozircha OAVga sirliligicha qolayotgan fuqaro tanishi orqali olib kelingan.“2021-yilning 25-iyul kuni o‘sha fuqaroni uch kishi olib kelgandi. Ularning ikki nafari — fuqaro kiyimidagilar mast edi. Aynan o‘sha mast kishilar fuqaroni olib qolishimizni talab qildi va bizga do‘q qildi. Kimlargadir qo‘ng‘iroq qilishini qo‘shimcha qilib, olib qolishimizni bildirdi. Va ikkalovi uxlab yotgan, karaxt ahvoldagi fuqaroni ko‘tarib, ichkariga kiritdi”, — deydi Isroil Norqobilov.
Voqeani o‘rgangan “Daryo” muxbiri bilan suhbatlashgan viloyat narkologiya dispanseri shifokorlaridan biri Beknazar Tugalov ham fuqaro shifoxonaga uch kishi tomonidan olib kelinganini aytgandi. Faqat u fuqaroni shifoxonada olib qolish kerak degan fikrga kelishida IIB xodimlarining ishtiroki yo‘qligini bildirgandi. Qolgan shifokorlar — Otabek Rasulov hamda Jahongir Suvonovlar fuqaro shifoxonaga olib kelinganidan boshlab, toki o‘limiga qadar uxlaganini, ortiqcha harakat qilmaganini aytgan.
2021-yilning 2-avgust kuni “Daryo” muxbiri bilan bog‘langan marhumning ukasi — Oltiboy Muhammadiyev ularni Qarshi tuman prokuraturasi chaqirganini, voqea haqida surishtira boshlaganini bildirgan.
“Bugun bizni prokuraturaga chaqirishdi va bor voqeani aytib berishimizni so‘rashdi. Shifokor Isroil Norqobilov akamni shifoxonaga olib kelganlarning o‘zi ham mast bo‘lganini, shu kuni akamni majburiy tarzda olib qolishlarini talab qilganini aytib berdi. O‘ylaymanki, prokuratura xodimlari shifokorning bu ma’lumotiga e’tibor qaratadi va adolatni tiklaydi”, — deydi marhumning ukasi.
Eslatib o‘tamiz, 25-iyul kuni Nishon tumani IIB HPB profilaktika inspektorlari tomonidan chaqiruvga asosan yashash uyidan mast holda olib ketilgan va viloyat narkologiya dispanseriga yotqizilgan Nursoat Muhammadiyev 26-iyul kuni vafot etgan.
Mazkur holat yuzasidan Qarshi tuman prokuraturasi tomonidan tergovga qadar tekshirish harakatlari olib borilmoqda. Marhumning o‘lim sabablarini aniqlash maqsadida sud-tibbiy ekspertizasi tayinlangan.
Bundan tashqari, Nursoat Muhammadiyevning viloyat dispanserida vafot etgani hodisasi bo‘yicha viloyat sog‘liqni saqlash va ichki ishlar boshqarmalariga xizmat tekshiruvi tayinlangan.
Izoh (0)