Prezident Shavkat Mirziyoyevning tadbirkorlar bilan ochiq muloqotidan avval ishbilarmonlarning tashabbus va muammolarini o‘rganish maqsadida tashkil etilgan shtab hamda Call-markazga hokimliklar ustidan shikoyat qilayotgan tadbirkorlar ham bor. Bu haqda Investitsiyalar va tashqi savdo vazirligi bosh mutaxassisi Dadaxon Jumaniyozov “Daryo” muxbiri Mirolim Isajonovga bergan intervyusida ta’kidlab o‘tdi.
Vazirlik vakilining qayd etishicha, hokimliklardan norozi tadbirkorlarning ko‘pchiligi yer masalasida murojaat yo‘llamoqda.
“Tadbirkorlar, asosan, yer bilan bog‘liq, ya’ni xususiy mulkni himoya qilish masalasida murojaat qilmoqda. Ular faoliyatini boshlashdan oldin hokimliklarga yer ajratib berilishini so‘rab yoki ajratilgan yer uchun qaror chiqartirishga borganida hokimiyat vakillari “Faoliyatingizni boshlab turavering, qaror chiqarib beramiz”, deb tadbirkorlarni og‘zaki ishontirishgan. Vaqt o‘tib, davlatimiz rahbarining yer islohotiga oid qator farmon va qarorlari imzolangach, hokimlarning yer ajratish vakolati bekor qilindi.
Shuning uchun tadbirkorlar mazkur masalada aziyat chekib, yechim topish niyatida murojaat yo‘llashyapti. “Hokimiyat meni ishontirgan edi, men u binoga pul sarflab, investitsiya kiritgandim. Hozir meni u yerda hech qanday qonuniy mulkim ham, huquqim ham yo‘q. O‘zim mablag‘ sarflagan binoda o‘zim ijarada o‘tiribman yoki ayrilib qoldim”, degan mazmunda ko‘p murojaatlar kelyapti. Biz tadbirkorlarning fikrlari qay darajada to‘g‘ri ekanligini bilish maqsadida har bir murojaatni individual tarzda o‘rganib chiqyapmiz”, — dedi Jumaniyozov.
Tahlillarga ko‘ra, 20-iyuldan 2-avgustgacha jami 10 ming 623 ta murojaat kelib tushgan. Shundan 3,5 mingdan ziyodi hal bo‘lgan.
“Kelib tushayotgan murojaatlar tahlili shuni ko‘rsatmoqdaki, bu mazmundagi arizalar respublika bo‘ylab 705 tani tashkil qiladi. Hududlar kesimida eng ko‘p murojaat Toshkent shahriga (79 ta) to‘g‘ri kelmoqda. Keyingi to‘rtlikda Qashqadaryo (64 ta), Samarqand (60 ta), Buxoro va Andijon viloyatlarini ko‘rish mumkin.
Hokimiyatlardan norozi bo‘lib, yo‘llanayotgan murojaatlarning yo‘nalishini tahlil qilsak, eng ko‘pi — 287 tasi yer bilan bog‘liq. Yuqorida aytganimdek, hokimliklar tadbirkorni og‘zaki ishontirib, haligacha unga yer ajratmagan yoki qaror chiqarib bermagan”, — dedi vazirlik rasmiysi.
Izoh (0)