Prezident Shavkat Mirziyoyev raisligida o‘tayotgan videoselektor yig‘ilishida birinchi yarim yillik natijalari asosida yil oxiriga qadar hududlar va tarmoqlarda barqaror iqtisodiy o‘sishni ta’minlash bo‘yicha aniq choralar belgilab olinmoqda.
Davlat rahbari ta’kidlashicha, o‘tgan 6 oyda yalpi ichki mahsulot 6,2 foizga o‘sgan. Bunga asosan sanoat 8,5 foiz, investitsiyalar 5,9 foiz va xizmatlar hajmi 8 foizga oshgani hisobiga erishildi. Inflyatsiya darajasi 10,9 foizni tashkil etdi.
Mavzuga doir: “Iqtisodiy o‘sish kamida 6 foiz bo‘lishi uchun mas’ullar qo‘shimcha zaxiralarni topishi kerak” — Shavkat Mirziyoyev
Bundan tashqari, oziq-ovqat sanoati mahsulotlari ishlab chiqarish hajmi respublikada jami 14,7 foizga oshgan.
Hududiy investitsiya dasturlari doirasida birinchi yarim yillikda prognozga nisbatan 2,5 barobar ko‘p yoki 5 ming 246 ta loyiha amalga oshirilgan.
Hisobot davrida mamlakatda jami 53 ming yangi kichik tadbirkorlik subyektlari tashkil etilib, 2020-yilga nisbatan 14 foizga oshgan.
2021-yil birinchi yarim yillikda esa 190 ming gektar qo‘shimcha yer maydonlari o‘zlashtirildi. 2020-yilning birinchi yarmiga nisbatan xizmatlar ko‘rsatish hajmi 18,3 foizga oshdi.
Prezident hududlar va tarmoqlarni barqaror rivojlantirish uchun yaratilayotgan moliyaviy va iqtisodiy sharoitlarni sanab o‘tdi.
Jumladan, sanoat tarmoqlariga bir yarim yil davomida 50 trillion so‘mdan ziyod bojxona imtiyozlari va tarif preferensiyalari berilgan. Birgina avtomobil sanoatiga 9,5 trillion so‘mlik, neft-gaz tarmog‘iga 2,8 trillion so‘mlik bojxona imtiyozlari taqdim etilgan.
So‘nggi 3 yilda qishloq xo‘jaligiga 1,5 trillion so‘m subsidiya ajratildi. Qishloq xo‘jaligini barcha yo‘nalishlarida klaster tizimi joriy qilinib, ularga 2021-yilning o‘zida 6 trillion so‘mdan ziyod kreditlar berildi.
Chorvachilik sohasida boshqaruv Veterinariya qo‘mitasiga berilib, uning tarkibida alohida agentlik tashkil qilindi. So‘nggi 3 yilda sohaga 350 million dollarga yaqin imtiyozli mablag‘lar jalb etildi.
Xizmatlar sohasini rivojlantirish bo‘yicha alohida Prezident qarori qabul qilinib, tadbirkorlar uchun zarur imtiyozlar va barcha imkoniyatlar yaratib berildi. Xususan, birinchi bosqichda 7 ta tijorat bankiga 1 trillion 575 milliard so‘m mablag‘ ajratildi.
Davlat rahbari yig‘ilishda avtomobilsozlik, energetika, kimyo sanoati, qurilish materiallari ishlab chiqarish, to‘qimachilik, charm sanoati, farmatsevtika, qishloq xo‘jaligi, jumladan, kartoshkachilik, meva-sabzavotchilik, uzumchilik, paxtachilik, g‘allachilik, chorvachilik, parrandachilik, oziq-ovqat sanoati, xizmat ko‘rsatish, tadbirkorlik sohalarini rivojlantirish bo‘yicha aniq vazifalarni belgilab berdi.
Yirik tarmoq sanoat korxonalarida 86 trillion so‘mlik mahsulot ishlab chiqarish, elektr energiyasi generatsiya quvvatlarini 1 ming 800 megavattga oshirish, yirik mahalliy sanoat korxonalarida 60 trillion so‘mlik yuqori qo‘shilgan qiymatga ega mahsulot ishlab chiqarish, to‘qimachilikda 15,3 trillion so‘mlik mahsulot ishlab chiqarish va 1,7 milliard dollarlik eksportni ta’minlash, 3,5 million tonna paxta yetishtirish, 1,5 million tonna go‘sht, 6,5 million tonna sut ishlab chiqarish, 1 ming 113 ta mahallani jamoat transporti bilan qamrab olish, yillik inflyatsiya darajasini prognoz ko‘rsatkichlari – 10 foiz doirasida bo‘lishini ta’minlash shular jumlasidan.
Bosh vazir o‘rinbosarlari, tarmoq va hududlar rahbarlari kun tartibidagi masalalar yuzasidan hisobot berdi.
Bundan avval O‘zbekiston iste’mol bozoridagi tovarlar va xizmatlar iyun oyida ham o‘rtacha 0,2 foizga arzonlashgani hamda O‘zbekistonda yaqin oylarda dori-darmonlar, tibbiy xizmatlar va asosiy oziq-ovqat mahsulotlari narxlari keskin oshishi mumkinligi haqida xabar berilgandi.
Izoh (0)