Zominning ikki kun avval o‘rmon yong‘ini yuz bergan tog‘larida yong‘oq kattaligida do‘l yog‘di

Jizzax viloyati Zomin tumani “Duoba” tog‘li hududlarida 3-avgust kuni do‘l yog‘di. Ijtimoiy tarmoqlarda holat aks etgan foto va videolar tarqaldi.

Gidrometeorologik ilmiy tahlillar, ob-havo prognozlari, tadqiqotlar, ma’ruzalar kanalining yozishicha, ba’zi do‘llarning kattaligi yong‘oqdek hajmni tashkil etgan. Kuchli jala va do‘l yog‘ish hodisalaridan so‘ng Zomin tog‘liklarida havo harorati keskin pasayib ketdi.

Eslatib o‘tamiz, bundan ikki kun avval, 1-avgust kuni soat 10:40 larda Jizzax viloyati Zomin tumani “Duoba” tog‘li hududlarida dala maydonida yong‘in sodir bo‘lgandi. Olovni o‘chirish uchun 400 ga yaqin xodim va 4 ta vertolyot jalb etilgan.

2-avgust kuni ushbu hududda yana yong‘in sodir bo‘lgani haqida xabarlar tarqaldi. Ammo Jizzax viloyati Favqulodda vaziyatlar boshqarmasi buni rad etib, hududda yong‘indan keyingi tozalash ishlari amalga oshirilayotgani, vaziyat to‘liq nazorat ostida ekanligini ma’lum qildi.