“Erimni hayvonlarcha urishgan, odam bolasi bunday qilmaydi”. Denovda inspektor yordamchilari urib o‘ldirib qo‘ygani aytilayotgan fuqaroning rafiqasi murojaat bilan chiqdi
Surxondaryoda profilaktika inspektorining yordamchilari IIBga olib ketilayotgan fuqaroni urib, o‘ldirib qo‘ygani to‘g‘risida xabar berilgandi. Ijtimoiy tarmoqlarda marhumning xotini ekani aytilayotgan ayol eri vafot etganda qanday holatda bo‘lganini aytib bergani tasvirlangan video tarqaldi.
Ayolning so‘zlariga ko‘ra, avvaliga unga erini ko‘rsatishmagan, uni ko‘rganida esa tanasida ko‘kargan va ezilgan joylar borligiga guvoh bo‘lgan. “Hayvonlarcha urishgan, odam bolasi unday urmaydi”, — deydi u.
Bosh prokuraturaning ma’lum qilishicha, 10-iyulda Denov tumani “Oqtom” mahallasida yashovchi fuqaro Y.X. tuman ichki ishlar bo‘limiga akasi H.X. mast holda yashash uyida janjal qilib, tinchligini buzayotgani haqida xabar bergan.
Shunga asosan, tuman IIO FMB profilaktika inspektori va uning ikki nafar yordamchisi H.X.ning xonadoniga kelgan va uni avtomashinaga o‘tkazib, tuman IIBga olib ketgan. Yo‘lda profilaktika inspektorining yordamchilari H.X.ni bir necha bor urib tan jarohati yetkazgan. Oqibatda H.X. 11-iyul kuni shifoxonada vafot etgan.
Marhum xotinining so‘zlariga ko‘ra, er va ayol o‘rtasida rashk sababli janjal kelib chiqqan, janjal davomida qaynata va qaynakasi kelib, ularni tinchlantirishga uringan. Shundan so‘ng er ham, ayol ham ishga ketgan. Ayol ishdaligida qaynsinglisi unga qo‘ng‘iroq qilib, erini ichki ishlar xodimlari qo‘liga kishan solib olib ketishganini aytgan.
“Men militsiyaxonaga, ‘uchatskovoy’ga chopdim. Erimni ko‘rsatishmadi. “Nima uchun olib keldinglar, katta janjal bo‘lgani yo‘q-ku?’ dedim. ‘Uchastkavoy’ ruxsat bersa ko‘rasan, bo‘lmasa ko‘rmaysan deyishdi. Uning telefon raqamini bilmasdim. Keyin o‘zlari o‘yin qilib uning raqamini olib berishdi. O‘sha yerdagi do‘konga kelgan yigitning telefonida ‘uchastkovoy’ Meliqul akaga telefon qildim, erimni ko‘rsatinglar dedim. U esa ‘Sen aralashma, ishing bo‘lmasin, ering nadzorda turadi’, deb telefonni o‘chirib qo‘ydi”, — deydi ayol.
Marhumning rafiqasini aytishicha, u kechgacha IIB binosi oldida o‘tirgan, biroq unga erini ko‘rsatishmagan. Ertasi kuni ayol ishdaligida qaynsinglisi telefon qilib, akasi kasalxonada ekanini aytgan.
“Qo‘limda bolam bilan uchib yetib bordim. Borsam, erim bir avholda... Hayvonlarcha urgan uni, odam bolasi unday urmaydi. Nima uchun urgan? Jigari ezilgan, boshi yorilib ketgan, hamma tarafi — ko‘zlari qoraygan, lablari shishgan. Erkaklik joylarigacha yorib tashlagan. Odam ham shunchalik vahshiylik qiladimi?! Ikkita bolam bilan qayerga boraman? Organga mumkinmi birovni o‘ldirish?” – deydi ayol.
Bosh prokuraturaning ma’lum qilishicha, mazkur holat yuzasidan Denov tuman prokuraturasi tomonidan Jinoyat kodeksining 104 (qasddan badanga og‘ir shikast yetkazish) va 206-moddasi (hokimiyat yoki mansab vakolati doirasidan chetga chiqish) bilan jinoyat ishi qo‘zg‘atilgan.
Jinoyat ishi doirasida 2 nafar shaxsga nisbatan qamoqqa olish ehtiyot chorasi qo‘llanilgan. Surxondaryo viloyat prokuraturasi tomonidan tergov harakatlari olib borilmoqda.
