Turkmaniston poytaxtida savdo markazlari, basseyn va sport zallari yopildi. Mamlakatda haligacha koronavirus rasman qayd etilmagan

Turkmaniston poytaxti Ashxobodda “Mustaqillikning 15 yilligi” va “Berkarar” savdo markazlaridagi do‘konlar egalari 1-avgustdan ushbu savdo markazlarining vaqtincha yopilishi haqida ogohlantirildi. Bu haqda sotuvchilarning o‘zlari “Xronika Turkmenistana” gazetasiga xabar bergan.

Do‘kon egalarining so‘zlariga ko‘ra, bozorlar tashqarisida savdo qilish mumkinligi da’vo qilinib, ularga ko‘chma savdo rastalarini sotib olish taklif etilmoqda.

Ashxobodda, shuningdek, ushbu haftadan basseynlar va ko‘plab sport zallari yopildi.

Avgust—sentabr oylarida oilaviy tantana va to‘ylar o‘tkazishni rejalashtirgan odamlar zarar ko‘rishi mumkin. Ularning so‘zlariga ko‘ra, ommaviy tadbirlarni o‘tkazishda cheklovlar joriy etiladimi yoki yo‘qmi, agar joriy etilsa, qachondan va qancha muddatga degan savollarga hech kim javob bera olmaydi. Ayrim manbalarga ko‘ra, bayramlarni taqiqlash avgustdan, boshqa manbalarga ko‘ra, sentabrdan boshlab joriy etiladi.

Poytaxtdagi oilaviy tantanalar o‘tkaziladigan markazlar rahbarlarining so‘zlariga ko‘ra, ularga bu borada hech qanday ko‘rsatma berilmagan.

Iyul oxirida Ashxoboddagi eng yirik “Oltin asr” bozori yopilgani haqida xabar berilgandi.

Iyul oyi o‘rtalarida Turkmanistonda koronavirus tarqalishiga qarshi kurashish bo‘yicha Favqulodda komissiya qarori bilan poyezdlar harakati yana cheklangan.

Ma’lumki, cheklovlar joriy etilish mamlakatda koronavirusning yangi to‘lqini tarqalishi bilan bog‘liq bo‘ladi, ammo rasmiylar pandemiya boshlanganidan beri Turkmanistonda biror kishida COVID-19 qayd etilmaganini ta’kidlashda davom etmoqda, biroq mustaqil OAV nashrlari bu axborotning noto‘g‘ri ekanini qayd etgan.

22-iyunda Turkmaniston poytaxtida COVID-19’ning yangi to‘lqini kuzatilayotgani xabar qilingandi. 27-iyunda Turkmaniston prezidenti Gurbanguli Berdimuhamedov 1,5 millionta yangi samarali doza vaksinalarini xarid qilishni buyurgan. Keyinchalik mazkur topshiriqda Xitoyning Sinopharm preparati nazarda tutilgani taxmin qilingan. Iyul boshidan mamlakatda 18 yoshdan oshgan fuqarolarni majburiy tartibda emlash boshlangan.