Qozog‘iston hukumati koronavirus bilan bog‘liq og‘ir vaziyat tufayli 2-avgustdan respublikaning yirik shaharlarida, shu jumladan, poytaxtda cheklov choralarini kuchaytirmoqda. Infeksiyani nazorat qilish bo‘yicha idoralararo komissiya ma’lumotlariga ko‘ra, mamlakatdagi kunlik kasallanishning 65 foizi va kunlik o‘limning 55 foizi aynan ushbu shaharlarga to‘g‘ri kelmoqda.
27-iyul kuni komissiya Nur-Sulton, Olmaota, Chimkent, Atirau va Qarag‘andada karantin choralarini kuchaytirishga qaror qildi. Xususan, Ashyq loyihasida qatnashmaydigan barcha korxona va tashkilotlar faoliyati to‘xtatiladi. Markaziy davlat idoralari, ma’muriyatlar, huquq-tartibot organlari, sog‘liqni saqlash muassasalari, ommaviy axborot vositalari, oziq-ovqat do‘konlari, dorixonalar va hayotni ta’minlaydigan tashkilotlar bundan mustasno.
Bundan tashqari, ko‘ngilochar, sport, oilaviy, xotira va boshqa ommaviy tadbirlarni o‘tkazishga taqiq joriy etiladi. Shu bilan birga, davlat idoralari, idoralar, milliy kompaniyalar va boshqa tashkilotlar xodimlarining 80 foizi masofadan ishlashga o‘tkazilishi lozim. Oxirgi uch oy ichida koronavirusga qarshi emlangan va kasallikdan tuzalgan xodimlar bundan mustasno.
Infeksiyani nazorat qilish bo‘yicha idoralararo komissiya, shuningdek, Oqmola, Olmaota va Qarag‘anda viloyatlari ma’muriyatiga Nur-Sulton, Olmaota, Chimkent va Qarag‘andaga tutash hududlarda cheklovlarni kuchaytirish choralarini ko‘rishni tavsiya qildi.
Komissiya rahbari hamda bosh vazir o‘rinbosari Erali Tugjonov respublikaning ayrim hududlarida emlash darajasi pastligini qayd etdi. Rasmiyning ma’lum qilishicha, Mang‘istov viloyatida aholining atigi 25,6 foizi vaksinaning birinchi komponenti bilan emlangan, bu respublikadagi o‘rtacha ko‘rsatkich (55,4 foiz)dan ikki baravar past. Yana oltita viloyat — G‘arbiy Qozog‘iston, Aqto‘be, Kostanay, Qarag‘anda, Jambil va Pavlodar viloyatlarining ko‘rsatkichlari ham o‘rtacha ko‘rsatkichdan ancha orqada.
Hammasi bo‘lib, 18,9 millionga yaqin aholiga ega Qozog‘istonda pandemiya boshidan buyon 580 379 kishida koronavirus aniqlangan, 478 277 bemor kasallikdan tuzalgan, 5957 kishi vafot etgan.
Mamlakatda 5 408 959 kishi koronavirusga qarshi vaksinaning birinchi dozasini olgan, ularning 3 799 879 nafari to‘liq emlangan.
30-iyul kuni Qozog‘istonda o‘tgan sutka davomida 7778 kishida koronavirus aniqlangandi. Bu pandemiya boshidan buyon eng yuqori ko‘rsatkich.
Undan avval ham Qozog‘istonda koronavirusga chalinganlar soni bo‘yicha kunlik rekord yangilangani, Nur-Sultonda karantin cheklovlari yana kuchaytirilgani, poytaxtda koronavirusning “hindcha” shtammi qayd etilgani haqida xabarlar berilgandi.
Izoh (0)