2-avgust kuni Armaniston prezidenti Armen Sarkisyan Nikol Pashinyanni respublika bosh vaziri lavozimiga tayinlash haqidagi farmonga imzo chekdi. Bu haqda prezident matbuot xizmatiga tayanib, “Interfaks” xabar berdi.
“Konstitutsiya qoidalariga binoan, Nikol Pashinyan Armaniston Respublikasi bosh vaziri etib tayinlansin” — deyiladi prezident farmonida.
Armaniston konstitutsiyasiga ko‘ra, mamlakat prezidenti yangi saylangan Milliy Assambleya (parlament)ning vakolat muddati boshlanganidan so‘ng, darhol parlamentdagi ko‘pchilik tomonidan ko‘rsatilgan nomzodni bosh vazir etib tayinlaydi. Pashinyanning nomzodi 2-avgust kuni parlamentdagi hukmron “Fuqarolik shartnomasi” fraksiyasi tomonidan ilgari surilgan.
Konstitutsiyaga muvofiq, bosh vazir tayinlanganidan keyin 15 kun ichida Armaniston hukumati tuziladi. Shundan so‘ng hukumat boshlig‘i 20 kun ichida Milliy Assambleyaga Vazirlar Mahkamasi dasturini kiritishi kerak.
20-iyun kuni Armanistonda navbatdan tashqari parlament saylovlari bo‘lib o‘tdi, unda 21 partiya va 4 ta blok ishtirok etdi.
27-iyun kuni Markaziy Saylov komissiyasi muddatidan oldin o‘tkazilgan parlament saylovlarining yakuniy natijalarini e’lon qildi, unga ko‘ra, Pashinyan partiyasi 53,91 foiz ovoz bilan g‘alaba qozondi. Armanistonning sobiq prezidenti Robert Kocharyan boshchiligidagi “Armaniston” bloki 21,9 foiz ovoz to‘pladi, Armanistonning yana bir sobiq prezidenti Serj Sarkisyan atrofida tuzilgan va Milliy xavfsizlik xizmatining sobiq direktori Artur Vanesyan boshchiligida “Shon-sharaf” bloki esa 5,22 foiz ovoz oldi.
17-iyul kuni Armaniston Konstitutsiyaviy sudi parlament saylovlari natijalarini haqiqiy deb topdi.
Izoh (0)