Туркманистон пойтахти Ашхободда «Мустақилликнинг 15 йиллиги» ва «Беркарар» савдо марказларидаги дўконлар эгалари 1 августдан ушбу савдо марказларининг вақтинча ёпилиши ҳақида огоҳлантирилди. Бу ҳақда сотувчиларнинг ўзлари «Хроника Туркменистана» газетасига хабар берган.
Дўкон эгаларининг сўзларига кўра, бозорлар ташқарисида савдо қилиш мумкинлиги даъво қилиниб, уларга кўчма савдо расталарини сотиб олиш таклиф этилмоқда.
Ашхободда, шунингдек, ушбу ҳафтадан бассейнлар ва кўплаб спорт заллари ёпилди.
Август—сентябрь ойларида оилавий тантана ва тўйлар ўтказишни режалаштирган одамлар зарар кўриши мумкин. Уларнинг сўзларига кўра, оммавий тадбирларни ўтказишда чекловлар жорий этиладими ёки йўқми, агар жорий этилса, қачондан ва қанча муддатга деган саволларга ҳеч ким жавоб бера олмайди. Айрим манбаларга кўра, байрамларни тақиқлаш августдан, бошқа манбаларга кўра, сентябрдан бошлаб жорий этилади.
Пойтахтдаги оилавий тантаналар ўтказиладиган марказлар раҳбарларининг сўзларига кўра, уларга бу борада ҳеч қандай кўрсатма берилмаган.
Июль охирида Ашхободдаги энг йирик «Олтин аср» бозори ёпилгани ҳақида хабар берилганди.
Июль ойи ўрталарида Туркманистонда коронавирус тарқалишига қарши курашиш бўйича Фавқулодда комиссия қарори билан поездлар ҳаракати яна чекланган.
Маълумки, чекловлар жорий этилиш мамлакатда коронавируснинг янги тўлқини тарқалиши билан боғлиқ бўлади, аммо расмийлар пандемия бошланганидан бери Туркманистонда бирор кишида COVID-19 қайд этилмаганини таъкидлашда давом этмоқда, бироқ мустақил ОАВ нашрлари бу ахборотнинг нотўғри эканини қайд этган.
22 июнда Туркманистон пойтахтида COVID-19’нинг янги тўлқини кузатилаётгани хабар қилинганди. 27 июнда Туркманистон президенти Гурбангули Бердимуҳамедов 1,5 миллионта янги самарали доза вакциналарини харид қилишни буюрган. Кейинчалик мазкур топшириқда Хитойнинг Sinopharm препарати назарда тутилгани тахмин қилинган. Июль бошидан мамлакатда 18 ёшдан ошган фуқароларни мажбурий тартибда эмлаш бошланган.
Изоҳ (0)