Oliy Majlis Senatining 17-yalpi majlisida Ekologiya va atrof-muhitni muhofaza qilish davlat qo‘mitasi raisining davlat o‘rmon fondiga kirmaydigan daraxt va butalarning kesilishiga doir masala yuzasidan axboroti eshitildi. Bu haqda yuqori palata matbuot xizmati xabar berdi.
Unda moratoriy davrida 5 mingdan ortiq jismoniy va yuridik shaxslar tomonidan 166 ming tup atrofida qimmatbaho navli davlat o‘rmon fondiga kirmaydigan daraxt va butalarni kesishga ruxsat so‘rab qilgan murojaatlar rad etilib, daraxtlarning barchasi saqlab qolingani aytilgan.
Biroq daraxtlarning noqonuniy kesilishi bilan bog‘liq tizimli muammolar saqlanib qolgan.
Qayd etilishicha, hukumatning 2018-yil 31-martdagi 255-sonli qarori bilan hududiy ekologiya va atrof muhitni muhofaza qilish organlari davlat o‘rmon fondiga kirmaydigan daraxt va butalarni kesishga oid o‘z xulosalarini tumanlar (shaharlar) hokimliklariga yuborishi va o‘z navbatida mahalliy davlat hokimiyati organlari tomonidan ruxsatnoma berish amaliyoti joriy etilgan.
Ta’kidlanishicha, aynan ushbu amaliyot o‘rmon fondiga kirmaydigan daraxt va butalarning noqonuniy kesilishiga ruxsat berishga shart-sharoit yaratib bermoqda.
2021-yilning 6 oyi davomida respublikada daraxt va butalarning noqonuniy kesilishi bilan bog‘liq 2 597 ta huquqbuzarlik sodir etilgan va o‘simlik dunyosiga 6,7 milliard so‘m zarar yetkazilgan. Aniqlangan huquqbuzarliklar natijasida 2 407 ta qimmatbaho navli daraxt, 2 109 ta kam qimmatli daraxt, 1744 metr kub butalar noqonuniy kesilgan.
Misol uchun, 2021-yilning boshidan daraxt va butalarning noqonuniy kesilishi va shikastlantirilishi bilan bog‘liq holatlar hududlar kesimida tahlil etilganda eng ko‘p Qoraqalpog‘iston Respublikasi (1 065 ta), Samarqand (609 ta), Qashqadaryo (534 ta), Navoiy (349 ta), Toshkent (344 ta) viloyatlari hissasiga to‘g‘ri kelgan.
Avvalroq Surxondaryoda 109 tup qimmatbaho daraxtni noqonuniy kesgan mas’ul xodim jarimaga tortilgani, Bekobodda hovlisi yonidagi 2 tup chinorni kesgan oila 131 million so‘m zararni to‘lashi, O‘zbekistonda daraxt ekib, parvarish qilmagan mutasaddi tashkilotlarni jarimaga tortish taklif qilingani hamda O‘zbekistonda to‘rt oy davomida 2000 dan ziyod noqonuniy daraxt kesish holatlari aniqlangani haqida xabar berilgandi.
Izoh (0)