Rossiya Samara viloyatidagi harbiylarni O‘zbekiston bilan qo‘shma harbiy mashg‘ulotlar o‘tkazish uchun Afg‘oniston bilan chegara hududiga o‘tkazdi. Bu haqda “Interfaks” xabar qilgan.
“Markaziy harbiy okrugning maxsus topshiriqlar hamda tinchlik uchun birlashuv bo‘linmasi Rossiya—O‘zbekiston qo‘shma harbiy mashg‘ulotlarida ishtirok etish uchun Surxondaryodagi ‘Termiz’ poligoniga kelishni boshladi. Harbiylar Samaradagi ‘Kurumoch’ xalqaro aeroportida Il-76 samolyotiga qurollar, zarur buyumlarni ortib, barcha bojxona jarayonlaridan o‘tdi va Termiz shahriga jo‘nab ketdi”, — deyiladi Rossiya markaziy harbiy okrugi matbuot xizmatining xabarida.
Avval Rossiya hamda O‘zbekiston Qurolli Kuchlarining 1,5 ming nafarga yaqin harbiysi 30-iyuldan 10-avgustgacha harbiy mashg‘ulotlarda ishtirok etishi xabar qilingandi. Rossiya harbiylarining asosiy qismi Markaziy harbiy okrugning maxsus topshiriqlar hamda tinchlik uchun birlashuv bo‘linmasining askar va zobitlaridan iborat.
Rossiya markaziy harbiy okrugi bergan axborotga ko‘ra, mashg‘ulotlar davomida harbiylar Markaziy Osiyo mintaqasi davlatlarining hududiy yaxlitligini muhofaza qilish masalalari bo‘yicha o‘zaro tajriba almashadi.
Ikki davlat harbiylari ishtirok etadigan mashg‘ulotlarda 200 ga yaqin harbiy texnika, jumladan, aviatsiya vositalaridan foydalaniladi. Xususan, Rossiyaning Qirg‘izistondagi “Kant” aviabazasining “Su-25SM” shturm samolyotlari o‘quv mashg‘ulotida ishlatiladi. Mazkur samolyotlardan Kollektiv xavfsizlikni ta’minlash kelishuviga a’zo mamlakatlarning havodan keladigan xavfni bartaraf qilishda foydalaniladi.
Rossiya shturm samolyotlari mashg‘ulotlarda qo‘shinlarning qo‘shma guruhining o‘quv-jangovar maqsadlarga erishishi, ya’ni Markaziy Osiyo mamlakatlari hududiy yaxlitligini ta’minlashida ularni havodan qo‘llab-quvvatlaydi. Shuningdek, “Su-25SM” shartli dushman yashirinib turgan joyni topish va uni yo‘q qilish, zenit raketalar kompleksi hujumlariga chap berish mashqlarini bajaradi.
Su-25 shturm samolyoti — quruqlikdagi qurolli kuchlarni jang maydonida qo‘llab-quvvatlash va ochiq nishonga to‘g‘ridan to‘g‘ri zarba berish uchun ishlatiladigan texnika. Samolyot kichik o‘lchamdagi harakatlanuvchan yoki bir yerda turadigan obyektlarga zarba beradi, shuningdek, sekin harakatlanadigan havo nishonini yo‘q qila oladi.
Avval Tojikiston “Tolibon” bilan muzokaralar olib bormayotganini ma’lum qilgani, Qozog‘iston tojik—afg‘on chegarasida xavfsizlikni ta’minlash uchun Tojikistonga harbiy-texnik yordam yuborishi, Rossiya Afg‘onistondagi ziddiyat sababli Tojikistonga qurol-yarog‘ yuborgani, Rossiya Afg‘onistondagi hokimiyat “Tolibon” tomonidan egallab olinishi ssenariysiga tayyorligi haqida xabarlar berilgandi.
Izoh (0)