Tojikiston hukumati tojik-afg‘on chegarasiga tutash hududlar xavfsizligini ta’minlash uchun Qozog‘istondan harbiy-texnik yordam olish to‘g‘risida bitim loyihasini imzolashga ko‘rsatma berdi, deb yozadi Asia-Plus.

Foto: myseldon.com

Tojikiston hukumati nomidan hujjatni mamlakatning Qozog‘istondagi elchisi imzolaydi. Shartnoma loyihasida aytilishicha, Tojikistonga harbiy-texnik yordam harbiy mulkni beg‘araz topshirish shaklida amalga oshiriladi.

“Harbiy mulkning nomlari va hajmi ushbu shartnoma imzolanganidan keyin 2 oy ichida ikki davlatning vakolatli organlari tomonidan diplomatik kanallar orqali muvofiqlashtiriladi”, — deyiladi loyihada.

Qabul qilinadigan yordam faqat tojik-afg‘on chegarasida xavfsizlikni ta’minlash maqsadida ishlatilishi lozim. Harbiy texnikani Dushanbegacha (“Rohati” temiryo‘l stansiyasigacha) yetkazib berish Qozog‘iston hukumati mablag‘lari hisobidan amalga oshiriladi.

“Qozog‘iston Respublikasidan o‘tkaziladigan harbiy mulkni bojxona rasmiylashtiruvi va deklaratsiyasi Yevrosiyo Iqtisodiy Ittifoqi qonunchiligiga muvofiq amalga oshiriladi”, — deyiladi shartnoma loyihasida.

O‘tkaziladigan harbiy mulk barcha turdagi bojlar, soliqlar va yig‘imlardan ozod qilinadi.

Afg‘onistondagi vaziyatning kuchayishi fonida avvalroq Rossiya harbiylari Tojikistonda o‘quv mashg‘ulotlarini boshlagandi.

Shuningdek, Tojikistondagi harbiy poligonda 5—10-avgust kunlari bo‘lib o‘tadigan o‘quv mashg‘ulotlarida Rossiya va Tojikiston harbiy xizmatchilaridan tashqari, O‘zbekiston Qurolli Kuchlari ham ishtirok etadi.

5-iyul kuni Tojikiston prezidenti Emomali Rahmon tojik-afg‘on chegarasini mustahkamlash uchun armiya rezervidagi 20 ming nafar harbiy xizmatchini safarbar etgani, Vladimir Putin Tojikistonga Afg‘oniston bilan chegaradagi vaziyatning keskinlashuvi munosabati bilan yordam berishni va’da qilgani, O‘zbekiston Prezidenti Shavkat Mirziyoyev 5-iyul kuni Vladimir Putin bilan telefon orqali muloqot qilib, suhbat davomida Afg‘onistonning shimoliy hududlaridagi ahvol yomonlashishi fonida Markaziy Osiyodagi vaziyatning rivojiga alohida to‘xtalib o‘tgani haqida xabarlar berilgandi.