Toshkent viloyatining Zangiota tumani hokimligi “Ibrat” mahallasida yangi ochilgan bolalar maydonchasiga yotqizilgan yashil sun’iy qoplamalar (gazon) maydoncha ochilishi marosimidan so‘ng yig‘ishtirib ketilgani, bolalar shag‘al ustidagi maydonchada qolgani haqida “Rost24.uz” xabariga izoh berdi.
Xabarda aytilishicha, bu holat bolalarning ko‘z o‘ngida sodir bo‘lgan, maydonchani qurishda Milliy gvardiya, Zangiota tuman hokimligi va Enter engineering kompaniyasi mas’ul bo‘lgan.
“Yozgi ta’tilni hisobga olgan holda bolalar zerikib qolmasliklari uchun bolalar maydonchasi qisqa fursatda foydalanishga topshirildi va ochilish marosimi bo‘lib o‘tdi. Oradan bir oydan ortiq vaqt o‘tgan, kun issiqligi sababli yotqizilgan chimlar yaroqsiz holga kelgan. Shu sababli ularni almashtirish maqsadida eski chimlar olib tashlangan. Yangi chimlar joriy yil 1-avgustga qadar yotqizilishi rejalashtirilgan”, — deya ma’lum qilgan tuman hokimligi, shuningdek, “Ibrat” mahallasida keng ko‘lamli ishlar olib borilishi hali davom etayotgani ta’kidlangan.
Hokimlikning bildirishicha, “Ibrat” mahallasi Zangiota tumani 4-sektor hududida joylashgan bo‘lib, “Milliy gvardiya tashabbusi va sa’y-xarakatlari bilan Zangiota tumani hokimligi bilan hamkorlikda ushbu mahalla tubdan o‘zgarmoqda”. Mahallada bolalar uchun maydoncha bo‘lmagan. Milliy gvardiya tashabbusi va sa’y-harakatlari bilan bolalar maydonchasi barpo etilgan.
Izoh (0)