O‘zbekiston “Sputnik V” vaksinasini Rossiyadan sertifikat olinganidan keyin ishlab chiqaradi. Bu haqda Farmatsevtika tarmog‘ini rivojlantirish agentligi direktori Sardor Kariyevga tayanib, “Gazeta.uz” xabar berdi.
Kariyevning ta’kidlashicha, O‘zbekistonda Jurabek Laboratories MCHJ tomonidan “Sputnik V” vaksinasining namuna dozalari ishlab chiqarilgan va Rossiyaning Gamaleya institutiga sinovdan o‘tkazish va sertifikatsiya qilish uchun yuborilgan.
“Avgustning birinchi haftasiga ijobiy javobni kutyapmiz. Undan keyin (Jurabek Laboratories) sexida ishlab chiqariladi”, — dedi Kariyev.
Jurabek Laboratories ishlab chiqarish direktori Farrux Lutfullayevning nashrga ta’kidlashicha, zavod tomonidan birinchi bosqichda 2 million doza “Sputnik V” va 10 million doza xitoy-o‘zbek vaksinalarini ishlab chiqarish rejalashtirilgan.
“Sputnik V” vaksinasi qachon ishlab chiqarilishi bo‘yicha savolga u Gamaleya institutidan xomashyo kelishini kutishayotganligini ta’kidladi. “Avgust o‘rtalarida quyishni boshlasak, avgust oxirida yetkazib berishni rejalashtiryapmiz”, — dedi u.
Uning qo‘shimcha qilishicha, xitoy-o‘zbek vaksinasini ishlab chiqarish masalalari hozirda Xitoydan kelgan delegatsiya tomonidan o‘rganilmoqda. Zavodning texnik va texnologik imkoniyatlariga ijobiy baho berilganidan keyin, Xitoyga tekshiruv uchun O‘zbekistonda quyilgan vaksina namunasi yuboriladi va sinovdan o‘tkaziladi.
Bundan avval Shavkat Mirziyoyev avgust oyining dastlabki haftasidan boshlab O‘zbekistonda “Sputnik V” vaksinasi ishlab chiqarish boshlanishini ma’lum qilgani, O‘zbekistonga 1,2 mln doza Pfizer vaksinasi olib kelinishi hamda Shavkat Mirziyoyev hokimlarga vaksinatsiya bo‘yicha ishlarni qattiqqo‘llik bilan nazoratga olishni topshirgani haqida xabar berilgandi.
Izoh (0)